Tarazdaǵy balalar úıinen kelgen 4, 6 jastaǵy ul men qyzǵa osteogenezi jetilmegen dıagnozy qoıylyp, qańqanyń uzyn súıekteriniń deformasııalaryn joıý otasy jasaldy. Tıisti ota jasalmasa balalardyń damýyna keri áseri tııýi múmkin.
«Bul dıagnoz ary qaraı damıtyn bolsa balalar ózdiginen qozǵala almaıtyn bolady. Bul hırýrgııalyq túzetýde ınnovasııalyq ádisterdiń biri – fassier-duval teleskopııalyq ıntramedýllıarlyq ózekter qoldanyldy. Negizgi artyqshylyǵy – ony jeńil ornatý jáne uzyn qubyrly súıekterdiń epıfızderine jaqsy bekitý», deıdi №2 balalar aýrýhanasynyń ortopedııa jáne ońaltý bóliminiń meńgerýshisi Agabek Chıkınaev.
Bul operasııa Reseıdiń tanymal professory, EPOS Eýropalyq balalar ortopedteri qoǵamynyń múshesi Konstantın Jerdevpen birge qazaqstandyq mamandardy oqytý aıasynda júrgizildi.
«Mundaı ota bizde alǵash ret ótip otyr. Qobaljyǵanymyzben kásibı daıyndyqpen keldik. Bul mamandarymyzdyń biliktiligin arttyrýǵa jáne halyqaralyq tájirıbe jınaýǵa yqpal etti. Aldaǵy ýaqytta qazaqstandyq dárigerler kúrdeli operasııalardy júrgizýde osy ınnovasııalyq ádisti qoldana alady. Sebebi mundaı dıagnozy bar pasıentterdiń sany jyl saıyn artyp keledi», dep bólisti dáriger Baqtııar Jumabekov.
