Eske salsaq, byltyr pandemııa kezinde «Qazaqstan» korporasııasy mádenı-rýhanı baǵyttaǵy Abai TV telearnasyn ashqan edi. Sodan keıin túrkitildes, kórshiles elderdiń tarıhyna, mádenıetine qatysty ónim almasý maqsatynda barlyq memleket ókilderine suranys-hat joldandy.
XVII Eýrazııa medıaforýmy aıasynda baıandama jasaǵan korporasııa basshysy Lázzat Tanysbaı ekijaqty baılanystyń nátıjesinde qazir Abai TV efırinen túrkııalyq áriptesterimiz daıyndaǵan birneshe derekti fılm kórsetilip jatqanyn aıtty. «Biz olardy dýblıajdap, óz tilimizde kórermenge usynamyz jáne ózge elderdiń de ónimderin qazaq tiline aýdaryp, efırden berýge daıyn ekenimizdi jetkizgimiz keledi. Teleındýstrııa óte qarqyndy damyp jatqan qazirgi kezde tek kontent almasyp qana qoımaı, tájirıbe almasqanymyz da óte mańyzdy dep esepteımiz. Mysaly, bizdiń korporasııa mamandary Túrkııanyń ozyq telearnalaryna jıi baryp turady, jaqynda ǵana kórshiles Qyrǵyzstannyń telearnalarynyń basshylary kelip pikir almasty, stýdııalarymyzdy kórdi, ortaq memorandýmǵa qol qoıdyq. Nátıjesinde, qyrǵyz tarapymen birlesip, uly jazýshy Shyńǵys Aımatovqa arnalǵan derekti fılm túsirip jatyrmyz», dedi korporasııa basshysy.
Fılmniń negizgi leıtmotıvi Shyńǵys Aıtmatovtyń shyǵarmashylyǵyna qurylǵan. Sondaı-aq jazýshynyń eki el arasyndaǵy ádebı-mádenı baılanysty nyǵaıtý jolynda atqarǵan eńbekteri baıandalady. Túsirý toby Aıtmatovtyń aýyly Shekerde bolyp, ondaǵy jazýshynyń shyǵarmalaryna arqaý bolǵan derekti oryndardy túsirip qaıtqan. Qyrǵyz-qazaq birlesken derekti fılmi eki el arasyndaǵy tarıhı dostyq qarym-qatynasty nasıhattaý úshin jasalyp otyr.
Budan bólek, Lázzat Tanysbaı Balapan balalar telearnasy qyrǵyz anımatorlarymen birlesip, ǵarysh salasy týraly anımasııalyq joba túsirilimine daıyndyq bastaǵanyn atap ótti. «Qazirgi ýaqytta Qazaqstan bul sala boıynsha birqatar tabysqa qol jetkizdi, ónimderimiz syrtqy naryqqa shyǵa bastady. Eldegi balalarǵa arnalǵan Balapan telearnasy anımasııa óndirisiniń damýyna erekshe serpin berip otyr. Jylyna 250-300 bólimdi quraıtyn 20-25 anımasııalyq týyndy shyǵaryp otyrmyz. Túrkitildes elderdi birtutas túrki tarıhyn kórsetetin anımasııalyq jobalar óndirisine atsalysýǵa shaqyramyz», dedi basqarma tóraǵasy.
