Jeldeı júıtkigen jastar

Oblysta ulttyq sport túrlerin damytýda ilkimdi izdenister bar. Sonyń bir dáleli balalar men jasóspirimderge arnalǵan №10 at sporty mektebiniń jumys isteýi deý oryndy bolmaq. At sporty mektebine jańadan ǵımarat salynyp, paıdalanýǵa berilgenine kóp ýaqyt bola qoıǵan joq. Jaqynda osynda bolýdyń sáti tústi.  Eki qabatty jańa ǵımarattyń at sportymen aınalysýyna arnalǵan sporttyq zaly, 250 oryndyq kórermenge arnalǵan orynmen jaraqtandyrylǵan  aýmaǵy 50h25 bolatyn jabyq maneji, qazaq kúresi, toǵyzqumalaq sporty jattyǵý zaldary bar. Qazir munda 376 bala aýdaryspaq, teńge ilý, báıge, qyz qýý, kókpar syndy ulttyq at sportymen aınalysady, sondaı-aq, kúres pen toǵyzqumalaq sekildi ulttyq sporttyq oıyn túrleriniń qyr-syryn úırenip júr. Osynda arnaıy atbasyn tiregen oblys ákimi Arhımed Muhambetov at sporty mektebiniń materıaldyq-tehnıkalyq bazasymen tanysty. Jas sportshylar óńir basshysyna atpen kedergilerden sekirý men aýda­ryspaq oıynyn kórsetti. Atalǵan mektep dırektorynyń oqý isi jónindegi orynbasary Abat Aımaǵambetovtiń aıtýynsha, at sportymen aınalysýǵa balalar 9-10 jastan bastap tegin qabyldanady, barlyq sport túrleri boıynsha jattyqtyrýshylar jetkilikti. At sporty mektebi 2005 jyly ashylǵan-dy. Buryn qystyń salqyn kúnderinde balalar dalada jattyǵa almaıdy eken. Jergilikti bıliktiń qoldaýymen ótken jyly jeltoqsan aıynda jańa ǵımarat paıdalanýǵa berildi. Endi munda ulttyq at sportynyń barlyq túrimen aınalysýǵa múmkindik týdy. Bolashaqta osyndaı at sporty mektepterin aýdandarda ashý kózdelýde. Sonda at sportynyń baǵy janyp, bási artary sózsiz. – Qazir mektepte 18 at bar. Aldaǵy ýaqytta odan da kóbeımek. Erdiń de sporttyq, konkýrlyq, kókparǵa arnalǵan, kavalerlik túrleri bar. Mektep qajetti quraldarmen tolyq jabdyqtalǵan. Soǵan saı balalardyń da jetis­tikteri jaqsy. Buryn aqtóbelik kókparshylar elimizde sońǵy oryndarda júrgen bolsa, byltyr el birinshiliginde segizinshi orynǵa taban tiredi. Bul jaman kórsetkish emes. Bizdiń kókpar komandasynyń músheleri ylǵı jastardan quralǵan. Sondyqtan olardyń bolashaǵynan úlken úmit kútemiz. Jastar arasynda at sportynyń túrlerinen sport sheberleri, respýblıkalyq jarys­tarda júldeli oralyp júrgenderi bar, – deıdi ol. Satybaldy SÁÝIRBAI, «Egemen Qazaqstan». Aqtóbe oblysy.