Erdoǵan Talıban men olardyń ýaqytsha úkimetiniń qazirgi kózqarasy ınklıýzıvti emes ekenin túsindirdi, biraq olar neǵurlym ınklıýzıvti úkimet qursa, Ankara olarmen yntymaqtasýǵa daıyn ekenin aıtty.
«Qazir Talıbanmen arada kelisimge kelgen, konsensýsqa qol jetkizgen birde-bir másele joq. Talıban qazir Katarmen birge, biz ásker shyǵardyq, beıbit turǵyndarymyz evakýasııalandy. Sondyqtan bul týraly aıtýdyń qajeti joq. О́ıtkeni qazir bizdiń bul jerge qatysymyz joq jáne Talıbanmen yntymaqtastyq týraly kelisim joq», dedi Prezıdent.
Erdoǵannyń aıtýynsha, Túrkııa men Aýǵanstandy tarıhı qatynastar baılanystyrady, Ankara Kabýldy árqashan qoldaıdy, biraq «jiberilgen qatelikterge» baılanysty túrik áskeri men azamattary elden evakýasııalandy.
«Meniń kelesi sózim ashyq jáne túsinikti bolý kerek, bizdiń aýǵan halqymen tarıhı qarym-qatynas jaǵynan baılanysymyz bar, biz Aýǵanstandy árqashan qoldaıtynbyz. Biz bolashaqta jalǵastyratyn iri ınvestısııalarǵa qatysamyz. Biraq qatelikterge baılanysty óz áskerimizdi shyǵaryp, beıbit turǵyndardy evakýasııalaýǵa májbúr boldyq. Biz qazir Aýǵanstanda joqpyz», dedi Erdoǵan.
Júrgizýshi Margaret Brennan Erdoǵanǵa Túrkııa tek uldarǵa mektepke barýǵa ruqsat beretin jáne áıelderge memlekettik qyzmet atqarýǵa tyıym salatyn úkimetpen qarym-qatynas jasaı ma degen suraq qoıdy. Erdoǵan Túrkııanyń áıelder máselesine kelgende, kózqarasy jaqsy dep jaýap berdi.
«Áıelder barlyq jerde, bilim berýde, densaýlyq saqtaýda, sot júıesinde qyzmet etedi. Eger bizdiń elde osyndaı jaǵdaı bolsa, nege biz Aýǵanstanda ustanymymyzdy ózgertýimiz kerek? Bizdiń kózqarasymyz Aýǵanstanǵa da qatysty. Eger olar kelisse, biz talıbandarmen bıznes jasaı alamyz, al eger olaı bolmasa, biz olarmen bıznes júrgizbeımiz», dedi Túrkııa Prezıdenti.
Buǵan deıin Erdoǵan Túrkııanyń Aýǵanstandaǵy beıbitshilik pen osy elde turatyn qandastarynyń ál-aýqaty, sondaı-aq óz múddelerin qorǵaý jolyndaǵy yntymaqtastyqtyń kez kelgen túrine daıyn ekenin aıtqan bolatyn.
