Delegasııa quramyna SAK memlekettik organdarynyń 50-den astam ókili, sondaı-aq munaı-hımııa (SABIC, Alkhorayef Group, Aramco), Energetıka (ACWA Power, Aljomaih Energy and Water Company, Desert Technologies), AKT (ELM, National Technology Group), AО́K (SALIC, Al Rajhi International for Investment Co, Hdeim Dates, Faidh International Food Company), densaýlyq saqtaý (Dr. Sulaiman Al-Habib Medical Group), farmasevtıka (Jamjoom Pharma), logıstıka (Zajil), týrızm (Seera), jeńil ónerkásip (Ajlan & Bros Group), saýda (Saudi Industrial Export) jáne t. b salasyndaǵy iri saýd kompanııalarynyń 30-ǵa jýyq basshylary kirdi.
Delegasııanyń sapary aıasynda eki eldiń isker toptary men bıznesiniń 170-ten astam ókilderiniń qatysýymen Qazaqstan-Saýd Arabııasynyń ınvestısııalyq bıznes-forýmy ótti. Is-shara barysynda saýdııalyq kompanııalar basty maqsaty jeke sektordy damytý, serpindi qoǵam qurý, sondaı-aq Koroldiktiń halyqaralyq saýdadaǵy básekege qabilettiligin arttyrýdy kózdeıtin «Saudi Vision 2030» ulttyq baǵdarlamasyn iske asyrý tájirıbesimen bólisti.
Is-sharany ashqan QR Saýda jáne ıntegrasııa Mınıstri Baqyt Sultanov qazaqstandyq bıznestiń Saýd Arabııasynyń isker toptarymen yntymaqtastyqty jandandyrýǵa múddeli ekenin atap ótti. О́z sózinde ol saýdııalyq kompanııalardyń bıznes-qoǵamdastyǵyn eki jaqty ekonomıkalyq qatynastarǵa jańa serpin beretin ınvestısııalyq jobalar boıynsha ózara tıimdi yntymaqtastyq qurýǵa shaqyrdy.
Syrtqy ister Mınıstriniń orynbasary Almas Aıdarov Saýd naryǵynyń Qazaqstanmen iskerlik baılanystar men saýda-ekonomıkalyq qatynastardy nyǵaıtýdaǵy zor mańyzyn, sondaı-aq «Saudi Vision 2030» ulttyq baǵdarlamasyn iske asyrý sheńberinde Qazaqstan men Saýd Arabııasynyń ınvestısııalyq yntymaqtastyǵyn keńeıtýdiń eleýli áleýetin atap ótti.
«Saýd Arabııasy kásipkerlikti damytý, ekonomıkany ártaraptandyrý, sondaı-aq áleýmettik reformalardy júzege asyrý boıynsha álemniń kóptegen elderi úshin tabysty modelge aınaldy. Biz «Saudi Vision 2030» strategııalyq baǵdarlamasyn júzege asyrýdyń tabysy men tıimdi nátıjelerin kórýge qýanyshtymyz. Aýyl sharýashylyǵy, munaı hımııasy, TKMK, JEK, qarjy jáne t.b. sııaqty ekonomıka salalarynda yntymaqtastyǵymyzdy odan ári damytý úshin bizdiń úlken áleýetimiz bar dep sanaımyn», - dep tolyqtyrdy Almas Aıdarov.
Forým sheńberinde qazaqstandyq taraptan spıkerler retinde «KAZAKH INVEST», «KIDF», «AHQO», «QazTrade» jáne «Kazakh Tourism» basshylary, sondaı-aq SAK ınvestısııalar Mınıstrligi jáne «NCPP» basshysy sóz sóıledi.
О́z sózinde «KAZAKH INVEST» UK» AQ Basqarma Tóraǵasy Meıirjan Iýsýpov saýdtyq seriktesterge Qazaqstan Respýblıkasynyń ınvestısııalyq áleýetin tanystyrdy, forým qatysýshylaryn ınvestısııalardy tartýdyń memlekettik júıesinde qoldanylatyn jańa tásildemelermen tanystyrdy, sondaı-aq QR men SAK ekijaqty qatynastaryn tereńdetýdiń mańyzdylyǵyn atap ótti.
«Búgingi tańda Saýd Arabııasynan Qazaqstanǵa keletin ınvestısııanyń jalpy kólemi 100 mıllıon AQSh dollarynan asady. Alaıda, bul kórsetkish bizdiń elderimizdiń áleýetin tolyq kórsete almaıdy. Osy maqsatta KAZAKH INVEST Qazaqstan men SAK bıznesiniń ınvestısııalyq yntymaqtastyǵyn nyǵaıtý boıynsha jan-jaqty jumys júrgizýde. Mysaly, QR Saýd Arabııasyndaǵy Elshiligimen birlesip, Djıdda saýda-ónerkásip palatalary men Ál-Kassım provınsııasynyń qoldaýymen, sondaı-aq NCPP-men birlesip, saýda, ekonomıka jáne ınvestısııalar salasyndaǵy Qazaqstan-Saýd yntymaqtastyǵynyń perspektıvalaryna arnalǵan birqatar is-sharalar ótkizildi. Bul bizge bıznes úshin barynsha qyzyǵýshylyq týdyratyn baǵyttar boıynsha birlesken is-qımyldardy odan ári úılestirý úshin iskerlik baılanystar ornatýǵa múmkindik berdi», - dep atap ótti Meıirjan Iýsýpov.
Sonymen qatar, is-shara alańynda KAZAKH INVEST qoldaýymen SAK ınvestısııalar Mınıstri Halıd ál-Falıhtyń QR Aýyl sharýashylyǵy Mınıstri jáne QR Energetıka Mınıstrimen, sondaı-aq «Qazatomprom» UAK» AQ, «KAZ Minerals» jáne t. b. basshylyǵymen birqatar kezdesýleri uıymdastyryldy.
Forým qorytyndysy boıynsha KAZAKH INVEST Saýd Arabııasynyń Investısııalar mınıstrliginiń quramyna kiretin NSPP-men (Ulttyq kompanııalardy ilgeriletý baǵdarlamasy) yntymaqtastyqtyń negizdemelik baǵdarlamasyna qol qoıdy. Memorandým taraptarǵa bıznes-uıymdar arasynda qatynastar ornatýǵa jáne olardyń saýda palatalary men basqa da múddeli uıymdardyń qatysýymen yntymaqtastyǵyn keńeıtýge, ózara tıimdi ınvestısııalardy ilgeriletýge jáne ınvestısııalyq jaǵdaılardy jaqsartýǵa baǵyttalǵan bastamalardy qoldaýǵa, sondaı-aq eki eldiń ınvestısııalyq jobalaryn ázirleýge jáne iske asyrýǵa járdemdesýge múmkindik beredi.
Sonymen qatar, forým aıasynda Saýd Arabııasy qazaqstandyq kompanııalarmen týrızm, agrobıznes, logıstıka jáne kommýnıkasııalyq tehnologııalar salasyndaǵy yntymaqtastyq týraly 6 Memorandýmǵa qol qoıdy.
Aıta ketý kerek, Qazaqstan-Saýd Arabııasy ınvestısııalyq bıznes-forýmynyń uıymdastyrýshylary QR Saýda jáne ıntegrasııa mınıstrligi men «KAZAKH INVEST» UK» AQ boldy.
