О́ńirge kelgen saparynda Prezıdent Qasym-Jomart Toqaev oblystyń áleýmettik-ekonomıkalyq damýy jónindegi jıynda ınflıasııa deńgeıiniń joǵary ekenin, munyń azyq-túlik taýarlary baǵasynyń tez ósýine áser etip jatqanyn atap ótken edi.
– Azyq-túliktiń 80 paıyzǵa jýyǵy ımporttalady. Osy rette, 50 myń tonna kókónis syıatyn qoımalardyń tapshylyǵy baıqalady. Bul elimiz boıynsha eń joǵary kórsetkish. Atalǵan máseleni mańyzdylyǵyna qaraı sheshý qajet. Ol úshin tıisti mehanızmder bar. Osyǵan qatysty Úkimet Kókónis qoımalarynyń qurylysy jónindegi jol kartasyn ázirledi. Azyq-túlik baǵasynyń qymbattaýyn toqtatý úshin aýyl sharýashylyǵy ónimderine tolyq qoljetimdi ári retke keltirilgen saýda alańdaryn ashý kerek. Ákimdikke Aqtaý qalasynda kommýnaldy jáne kóterme bazarlardy salýdy tapsyramyn, – dedi Memleket basshysy.
Memleket basshysynyń tapsyrmasynan soń Aqtaýda bul baǵyttaǵy jumys bastalyp ketti. О́ńir basshysyna jeke ınvestorlar esebinen Aqtaý qalasynyń 36-shaǵyn aýdanynda salynatyn «Aqtaý Avto qoıma» JShS jáne «Aqtaý Ors» JShS-niń jobalary tanystyryldy.
«Aqtaý Avto qoıma» JShS jobasy satý jáne taýar saqtaıtyn qoımasy bar eki fýnksıonaldyq aımaqtan turady. Jer teliminiń jalpy aýdany – 15 ga, onyń ishinde kommýnaldyq saýda bazarynyń aýdany 9-10 ga quraıdy. Sonymen qatar 2 myń sharshy metr aýmaqta pavılondar salynady. Onda fermerler óz ónimderin deldalsyz jáne jalǵa alý tólemderinsiz sata alady. Bul óz kezeginde tutynýshylar úshin baǵany qalyptastyrýǵa oń áser etedi. Saýda jáne qoıma kólemi 20 myń sharshy metr bolady. Jalǵa alýshylar sany – 500 adam. Jobaǵa salynǵan ınvestısııa quny 1,5 mlrd teńgeni quraıdy. Budan basqa, bazar aýmaǵynda avtomobılderge jáne qalalyq qoǵamdyq kólikterge arnalǵan 750 oryndyq avtobeket jumys isteıdi. Sondaı-aq bir mezette 500 adam syıatyn jolaýshylar termınaly ornalaspaq.
Kóterme saýda ortalyǵy bólshek saýda bazarlary, dúkender, meıramhanalar jáne basqa da bıznes sýbektileri úshin azyq-túlik taýarlarynyń kóterme saýdasyn uıymdastyrady. Osylaısha, deldaldy alyp tastap, jergilikti óndirýshilerdiń ónimin kepildi ótkizýdiń nátıjesinde azyq-túlik taýarlarynyń baǵasy tómendeıdi dep kútilýde. Jobaǵa salynǵan ınvestısııa quny 1,8 mlrd teńgeni quraıdy. Jer ýchaskesiniń jalpy aýdany – 12 ga. Jalǵa alýshylar sany, atap aıtqanda iri jáne orta kóterme saýdagerler sany 300 adam. Kásipkerlerge yńǵaıly bolý úshin tońazytqysh, qoımalar qyzmeti usynylady. Atalǵan jobalar 2023 jyly iske qosylady dep josparlanýda.
О́ńir basshysy Nurlan Noǵaev júrgizilip jatqan jumysqa oń baǵa berdi, sondaı-aq azyq-túlik naryǵyndaǵy baǵany turaqtandyrý boıynsha jumysqa iri kásipkerlerdi tartý qajettigin atap ótti jáne memlekettik organdar men kásipkerlik sýbektileriniń júıeli jumysy óńir ekonomıkasyna oń áserin tıgizetinin atap ótti.
Mańǵystaý oblysy
