«Elektrondyq eńbek bırjasynda paıdalanýshylarǵa Nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan «Eńbek» memlekettik baǵdarlamasy sheńberinde iske asyrylatyn jobalar boıynsha bos oryndar qoljetimdi boldy: «Urpaqtar kelisimsharty» (keıinnen turaqty jumys ornyna jumysqa ornalasa otyryp, bastapqy tájirıbe alý úshin) jáne «Birinshi jumys orny» (bilimi jáne jumys tájirıbesi joq jastar úshin)», dep jazady Eńbek jáne halyqty áleýmettik qorǵaý mınıstrligi.
Budan basqa, EEB-tegi jeke kabınette qazaqstandyqtar jumys izdep júrgen adam nemese jumyssyz retinde esepke tura alady. Jumysynan aıyrylǵan jaǵdaıda áleýmettik tólem alýǵa ótinim beredi. Sondaı-aq memleket sýbsıdııalaıtyn jumys oryndarynan (jastar praktıkasy, qoǵamdyq jumystar jáne áleýmettik jumys oryndary) bos oryn tańdaı alady.
Jyl basynan beri 102 myńnan astam azamat eńbek bırjasy arqyly memlekettik qyzmetterdi paıdalandy, onyń ishinde 88 myńy jumyssyz mártebesin aldy. Jalpy, 47,8 myń azamat jumysqa ornalastyryldy, onyń ishinde 24,4 myńy memleket sýbsıdııalaıtyn jumys oryndaryna ornalastyryldy. 12,2 myń qazaqstandyqqa jumysynan aıyrylǵan jaǵdaıda tólenetin áleýmettik tólemder taǵaıyndaldy.
Budan basqa, EEB-te erikti túrde qonys aýdarý boıynsha konsýltasııalyq qyzmet alý servısi jumys isteıdi. Azamattar ınteraktıvti kartada áleýetti qonys aýdarý óńiriniń aqparatyn kóre alady, sondaı-aq naqty aýylda/aýyldyq okrýgte ınfraqurylymmen, qabyldaý kvotasymen jáne bos jumys oryndarymen tanysa alady. Konsýltasııaǵa ótinim bergen kezde jumyspen qamtý ortalyǵynyń qyzmetkerleri ótinish berýshimen telefon arqyly habarlasady jáne áleýetti qonys aýdarýshyny qyzyqtyratyn barlyq suraqtarǵa jaýap beredi.
Sonymen qatar, osy jyldyń shilde aıynan bastap elektrondyq eńbek bırjasynda «Enbek Skills» platformasynda qazaqstandyqtar qajetti daǵdy boıynsha qysqa merzimdi oqytýdan ótip, túıindemede avtomatty túrde tirkeletin daǵdyny ıelený týraly sertıfıkat ala alady. Qazirgi tańda 100-den astam avtor saıtqa óziniń oqý kýrsyn ornalastyrdy. Búginde 3,6 myńnan astam adam oqýdan ótip, sertıfıkat aldy.
Qazan aıynda EEB-te jumys berýshiler úshin halyqty jumyspen qamtý ortalyǵyna barmaı-aq memleket sýbsıdııalaıtyn jumys oryndaryn ashý boıynsha fýnksıonaldy iske asyrý josparlanǵan.
