Almaty qalalyq ákimdiginiń málimetine súıensek, Jetisý aýdanyndaǵy Krylov-Skrıabın-Goncharov-Raıymbek ýchaskelerinde 304 páterlik, Kazakov-Skrıabın-Botkın-Raıymbek ýchaskelerinde 183 páterlik 2 kóp fýnksıonaldy turǵyn úı kesheniniń qurylysy 40%-ǵa aıaqtaldy.
Sondaı-aq, Túrksib aýdanyndaǵy Moldaǵalıev-Saýranbaev-Chernyshevskıı-Tolstoı kósheleriniń sharshysynda 62 páterlik 3 kóppáterli turǵyn úıdiń qurylysy bastaldy. Munda turǵan tozyǵy jetken úılerdiń ornyna zamanaýı turǵyn úıler boı kóteredi. Qurylys aıaqtalǵannan keıin budan buryn olarda turǵan turǵyndar jańa páterge kóshedi.
Jańa qurylystar seısmıkalyq tózimdilikti eskere otyryp jáne barlyq zamanaýı standarttarǵa sáıkes, onyń ishinde, halyqtyń júrip-turýy shekteýli toptarynyń qoljetimdiligi men ómir súrýiniń yńǵaılylyǵyn nazarǵa ala otyryp jobalanǵan. Jańa turǵyn úılerden basqa, aýmaqtarda halyqqa qyzmet kórsetý, áleýmettik nysandar salynady, jańa jeliler tartylady jáne qoǵamdyq keńistikter paıda bolady. Qurylysty qarjylandyrýdy jeke ınvestorlar júzege asyrady.
Turǵyn úıdiń jalpy aýdany 96 myń sharshy metrden asady. Alǵashqy úıler 2022 jyly paıdalanýǵa beriledi.
Esterińizge sala keteıik, Turǵyn úı qoryn qalpyna keltirýdiń 2021-2025 jyldarǵa arnalǵan baǵdarlamasy Almaty qalasy ákimdiginiń qaýlysymen bekitilgen. Ony iske asyrý aıasynda 708 tozyǵy jetken úıdi aýystyrý jáne olardyń ornynda 683 jańa turǵyn úı salý kózdelgen.
