Qazaqstan • 04 Qazan, 2021

Mádenı baılanys nyǵaıdy

44 ret kórsetildi

Qazan aıy Qazaqstanda Belarýs Respýb­lıkasynyń mádenıet kúnderi aıasynda elorda jurtshylyǵy «Kerýen» oıyn-saýyq jáne saýda ortalyǵyndaǵy kınoteatrdan 10-nan astam belarýs fılmin tegin tamashalady.

Kıno kúnderiniń shymyldyǵy rejısser Dmıtrıı Astrahannyń «Dıversanttyń taǵdyry» fılmimen ashyldy.

«Eki el arasyndaǵy yntymaqtastyq qarym-qa­ty­nastyń irgesi berik. Sonyń ishinde mádenı qa­rym-qatynas ta bar. Qazaqstan Belarýste ótetin iri má­denı-aǵartý is-sharalaryna belsene qatysyp keledi. Odan bólek, bizde memleket bıýdjetinen Bela­­rýs elimen birlesip fılm túsirýge qarjy qaras­ty­rylǵan», dedi Mádenıet jáne sport vıse-mınıstri Nur­ǵısa Dáýeshov.

Qazaqstandaǵy Belarýs Respýblıkasynyń Tó­ten­she jáne ókiletti elshisi Pavel Ýtıýpın sol el­de alǵash ret 2013 jyly Qazaqstannyń máde­nıet kúnderi atalyp ótilgenin aıtty. «Nur-Sul­tan qa­la­syndaǵy mádenıet kúnderin otandyq fılm­deri­mizdi usynýdan bastaımyz. Qazaqstandyq kó­rer­menderge tarıhı, kórkem jáne anımasııalyq fılm­der kórsetiletin bolady. Kınotýyndylar qazaqstandyqtardyń kóńilinen shyǵady dep oılaımyz. Sol sııaqty fılmderdi tamashalaý arqyly belarýs halqyn jaqynyraq tanı alasyzdar degen úmittemin», dedi ol.

Sondaı-aq elshiniń aıtýynsha, «Qazaqfılm» men «Belarýsfılm» birlesip «1941 jyldyń jazy» atty tarıhı fılm túsirgen.

«Ekinshi dúnıejúzilik soǵys – Belarýs pen Qazaq­stanǵa ortaq qasiret. Tıisinshe Jeńis te – búkil KSRO el­derine ortaq. О́kinishke qaraı, Uly Otan soǵysyna att­anǵan árbir úshinshi belarýs oralmady. Soǵys kezinde Bel­arýs aýmaǵyn azat etý jolynda kúresken 80-nen astam qazaq­standyq túrli dárejedegi marapatqa ıe boldy. Uly Otan soǵysy taqyryby ortaq bolǵandyqtan Belarýs pen Qazaqstan birlesken jobalardy qolǵa alyp jatyr. Sonyń biri – bıyl jazda «Qazaqfılm» men «Belarýsfılm» birlesip «1941 jyldyń jazy» atty fılm túsirdi. Jýyrda tusaý­keseri ótedi dep josparlanyp otyr», dedi Pavel Ýtıýpın. Atalǵan fılm qazaqstandyq partızan Ádı Sháripov týraly bolmaq.

Budan bólek, Belarýs mádenıeti kúnderi aıasynda Ulttyq mýzeıde Belarýs jas sýretshileriniń kórmesi ashyldy. Kórmege qazirgi Belarýsti beıneleıtin týyndylar qoıylǵan. Sonymen qatar Belarýs estrada juldyzdarynyń qatysýymen gala-konsert ótti.

Sońǵy jańalyqtar

Uqsas jańalyqtar