Sahnadaǵy oqıǵa traktorshynyń úıindegi urys-keristen órbıdi. Úı ishinde shyqqan janjaldan keıin Qoshqarbaıdyń jubaıy Kýmrı bala-shaǵasyn ertip, tórkinine ketip qalady. Osy sátte mehanızatordyń úıine jas ǵalym kelip, ózi oılap tapqan robot áıeldi kórsetedi. Robottyń qolynan kelmeıtini joq, úıdegi sharýanyń bárin únsiz júrip-aq áp-sátte tyndyryp tastaıdy. Úı ishi bylaı tursyn, tipti er adamnyń ǵana qolynan keletin syrttaǵy aýyr jumysty da myńq etpeı tyndyra salady. «Temir qatynnyń» qabiletine tánti bolǵan traktorshy oǵan oılanbastan úılenip alady. Molda shaqyryp, nekesin qıdyrady. Biraq robottyń aty robot, Qoshqarbaı tapsyrmany tap-tuınaqtaı etip oryndaıtyn «Temir qatynnan» jan jylýyn taba almaı, eńkildep jylaıdy.
Osylaısha, et pen súıekten jaratylǵan Qoshqarbaı men robottyń arasyndaǵy qarym-qatynas kún ótken saıyn shıelenise túsedi. Oılaý qabiletine ıe bolǵan soń «Temir qatyn» tipti órshı túsip, traktorshynyń qońyrqaı tirligin synap-mineı bastaıdy. Shetelge baryp demalyp, qymbat dúnıe satyp alyp jatqan jurtpen salystyryp, qulaq etin jep, kún-kórsetpeı qoıady.
Komedııanyń ekinshi bóliminde robot isten shyǵyp, jaramsyz bolyp qalady. Buǵan jas ǵalym «ǵylymı progrestiń naǵyz jaýysyń» dep mehanızatordy kinálaıdy. Aqyry Qoshqarbaı óz áıelimen qaıta tabysady. Sahnalyq týyndynyń qoıýshy rejısseri Batyrbek Shambetov qoıylym sheshimi arqyly kópshilik kórermenge búgingi qoǵamda zamanaýı tehnologııa men ǵylym jetistikteri kerek-aq, biraq adamı bolmysymyzdy, ózara syılastyǵymyzdy joǵaltyp almaıyq degen tujyrym usynady.
Premera aıaqtalǵan soń kórermender ártisterge degen ystyq yqylasyn bildirip, uzaq qol shapalaqtap turyp aldy. Osy sátte oblystyq mádenıet basqarmasynyń basshysy Erlan Qalmaqov sahnaǵa kóterilip, teatr ujymyna alǵys bildirip, jańa maýsymnyń ashylýymen quttyqtady.
Jýyrda ǵana Kókshetaý qalasynda dál osy premera úshin «Úzdik qoıylym» júldesine ıe bolǵan teatr ujymy endi Qaraǵandy qalasynda ótetin respýblıkalyq teatr festıvaline daıyndalyp jatyr.
