Ortalyq kommýnıkasııalar qyzmetinde ótken brıfıngte Shymkent qalasy ákiminiń birinshi orynbasary Shyńǵys Muqan osyndaı málimetter keltirdi. Úshinshi megapolıste indettiń yqtımal tolqynyna úsh ssenarıı boıynsha daıyndyq júrgizilgen. «A – aǵymdaǵy jaǵdaı 1 290 tósektik oryn. V – epıdemııalyq jaǵdaı nasharlasa, tósektik oryn sanyn 4 016 deıin jetkizý. S – epıdemııalyq daǵdarys oryn alsa, 5 416 tósektik oryn ashý josparlanǵan. 1 363 tósektik oryn jasaqtalyp tur. Qalalyq densaýlyq saqtaý júıesi V ssenarııimen jumys isteýde. Epıdemııalyq jaǵdaıdyń turaqtalýyna baılanysty 25 tamyzdan bastap 1 780 tósektik oryn jabyldy. Qazirgi tańda 496 azamat stasıonarlyq emdelýde. Tósektik oryn tolymdylyǵy 36% quraıdy, 867 tósektik oryn bos. Jańsaqtaý bóliminde 257 tósektik oryn bar, onda 79 azamat em qabyldaýda. Tolymdylyq – 30%. Jalpy, qala úsh ssenarııge de daıyn», dedi Sh.Muqan.
Shymkenttik naýqastyń ottegi tapshylyǵynan qaıtys bolǵany jóninde aqparat áleýmettik jelide taraǵan bolatyn. Jýrnalısterdiń osy oqıǵaǵa qatysty qoıǵan saýalyna jaýap bergen qala ákiminiń birinshi orynbasary bul máselemen áleýmettik jelige taraǵan boıda aınalysqanyn aıtty. «Bul mekemeniń basshysy búkil Shymkentti ottegimen qamtamasyz etýge jaýapty bolatyn. Bizde sol ýaqytta 25 ınfeksııalyq stasıonar boldy. Bul aqparat rastalmady. Meniń ózim arnaıy baryp kórdim. Onyń aldynda da kórgenmin. Bul stasıonar ottegimen tolyq qamtamasyz etilip turdy. Bizde Shymkent qalasynda úsh jerden ottegi alyndy. Sonymen birge byltyr 7 stasıonarda aldyn ala suıyq ottegi rezervýaryn ornatqanbyz. Syıymdylyǵy 8 tonnaǵa deıin barady, dep jaýap berdi Sh.Muqan. – Keı stasıonarda – 50, keıbirinde 200 ottegi núktesi bar. Keleńsiz oqıǵa oryn aldy degen stasıonarda 100-den astam núkte bar. Bir adamǵa ottegi barmaı qalýy múmkin emes. Sebebi ottegini jalǵaıtyn stansa bólek turady da, sol jerden ottegi ketkende 100 núkteniń bárine birdeı barady. Al eger ottegi taýsylyp qalǵan bolsa, núktege jalǵanǵan 100 adamǵa birdeı barmaı qalar edi. Sondyqtan bul aqparat rastalmady». Sondaı-aq ol indettiń órshýine adamdardyń óz betinshe emdelýi sebep bolǵanyn aıtty. «Naýqastardyń kóbi 15-16-shy, tipti 20-shy kúnderi aýrýhanaǵa aýyr jaǵdaıda túsip jatty. Olar osyndaı jeke praktıkadaǵy dárigerlerde emdelip, aýyr antıbıotıktermen 1-2 kýrs em qabyldaǵan. Al em qonbaǵan soń jedel járdem shaqyrtqan», dedi qala ákiminiń orynbasary. Mundaı jaǵdaı qaıtalanbas úshin densaýlyq saqtaý salasynda medısınalyq aǵartý jumystary kúsheıtilmek.
Shymkent qalasynda jyl basynan beri koronavırýs juqtyrǵan 34 416 naýqas anyqtaldy. Emdelip shyqqan naýqastar sany – 32 682, al 1 294 naýqas em qabyldaýda. Koronavırýs saldarynan jyl basynan beri 110 adam kóz jumǵan. Bastapqy medısınalyq kómek kórsetý boıynsha 36 emhanada 211 mobıldi brıgada jasaqtalǵan. Olar úı jaǵdaıynda em qabyldap jatqan 798 naýqaspen jáne koronavırýs juqtyrǵandarmen qarym-qatynasta bolǵan 3 506 adamǵa medısınalyq qyzmet kórsetýde. Stasıonarlarda dári-dármek jetkilikti, eki aılyq qor jasaqtalǵan jáne ol udaıy tekserilip, toltyrylyp otyrady. Bıyl 1 qańtardan bastap 30 qyrkúıekke deıin 38 379 nysan monıtorıng jumystarymen qamtylǵan. Monıtorıng qorytyndysy boıynsha 2 462 jaýapty tulǵaǵa hattama toltyrylyp, aıyppul salyndy. Sottyń sheshimimen 21 nysannyń jumysy ýaqytsha toqtatylǵan. Ashyq jobasy boıynsha Shymkentte 8 571 nysan jumys isteıdi. «Qyzyl» jáne «sary» statýsy bola turyp nysandarǵa barǵan jeke tulǵalar týraly 2 421 habarlama tústi. Shymkent qalasy boıynsha anyqtalǵany – 2 089. Basqa oblystardan kelip anyqtalǵan jeke tulǵalar – 332. Olar boıynsha sanıtarlyq-profılaktıkalyq is-sharalar atqarý úshin aýmaqtyq departamentterge hattar joldandy. Bul jumys jalǵasýda», dedi Sh.Muqan.
Qalada 45 egý nysany bar. Birinshi komponentpen 526 689, 2-komponentpen – 426 388 adam egildi. Jalpy, vaksınalaýǵa jatatyn kontıngenttiń 98,3% ekpeniń 1-komponentin alǵan. Aıdyń sońǵy kúni, ıaǵnı 30 qyrkúıekte KVI-diń 79 jaǵdaıy tirkelip, 42 adam ınfeksııalyq stasıonarǵa jatqyzylsa, 37-i úı baqylaýyna alynǵan.
ShYMKENT
