Bıyl forým Almatyda ótedi. Bul týraly búgin «Nur Otan» partııasy janyndaǵy azamattyq qoǵamdy damytý jáne memlekettik basqarý jónindegi respýblıkalyq qoǵamdyq keńestiń otyrysynda QR Aqparat jáne qoǵamdyq damý vıse-mınıstri Bolat Tlepov habarlady.
Qazaqstan Respýblıkasy Parlamenti Májilisiniń depýtaty, «Nur Otan» fraksııasynyń múshesi Aıdos Sarymnyń tóraǵalyǵymen «Nur Otan» partııasy janyndaǵy Azamattyq qoǵamdy damytý jáne Memlekettik basqarý jónindegi respýblıkalyq qoǵamdyq keńes otyrysynyń kún tártibinde «Nur Otan» partııasynyń 2025 jylǵa deıingi saılaýaldy baǵdarlamasynyń «jaýapty azamattyq qoǵam» baǵyty boıynsha Jol kartasynyń tarmaqtaryn iske asyrý barysy qaraldy.
Vıse-mınıstrdiń aıtýynsha, respýblıkada ÚEU-men ózara is-qımyldyń túrli dıalogtyq formattary jumys isteıdi.
«Azamattyq qoǵam men memlekettiń dıalogyn damytýdyń negizgi alańdarynyń biri 2003 jyldan beri turaqty negizde ótkizilip kele jatqan Azamattyq forým platformasy sanalady. Azamattyq forým alańy ózara is-qımyldyń strategııalyq basymdyqtaryn ázirleý úshin úkimettik emes sektor, halyqaralyq uıymdar, bıznes, sarapshylyq qoǵamdastyq ókilderin biriktiredi. Bıyl biz mereıtoılyq X Azamattyq forým ótkizýdi josparlap otyrmyz, onda azamattyq qoǵamdy damytý, onyń Táýelsizdiktiń 30 jyly ishindegi memleketpen ózara is-qımylynyń nátıjeleri usynylatyn bolady», dedi Bolat Tilepov.
Onyń aıtýynsha, ÚEU-men ózara is-qımyl salasyndaǵy konsýltatıvtik-keńesshi organ sanalatyn ÚEU-men ózara is-qımyl jónindegi úılestirý keńesi jumys isteıdi. Onda ÚEU salasyndaǵy zańnamany jetildirý máseleleri qaralady, mınıstrlikterdiń, oblys ákimdikteriniń strategııalyq qujattardy, azamattyq forýmdardyń usynymdaryn iske asyrý týraly esepteri tyńdalady. Keńes qyzmet etken jyldary (2005 jyldan bastap) 500-den astam usynymdar ázirlendi.
Vıse-mınıstr el damýynyń ózekti máselelerin sheshý úshin azamattyq belsendilerdi tartý, kvazımemlekettik sektorda qoǵamdyq keńester qurý jáne «Nur Otan» partııasynyń saılaýaldy baǵdarlamasyn iske asyrýdyń Jol kartasy sheńberinde saıası dıalog mádenıetin damytý boıynsha atqarylǵan jumystar týraly egjeı-tegjeıli aıtyp berdi.
