Jármeńke usynylǵan jumys oryndarynyń kóptigimen jáne psıhologtardyń qatysýymen erekshelendi. Jetkinshekter jumys izdep, eresekterden suraýǵa qysylǵan jaǵdaıda psıhologter olarǵa qoldaý kórsetip, keńes berip jatty. Buǵan qosa jumys izdeýshilerge túıindeme jazýda da kómek kórsetildi. Qalalyq jumyspen qamtý jáne áleýmettik qorǵaý basqarmasy jastar resýrstyq ortalyǵymen birge uıymdastyrǵan jármeńkede jalpy sany 9 myńǵa jýyq bos jumys oryndary usynyldy. AZALA Textile, «Sıtı Stroı», «Regolat», «Qaznur», «Alfa-Iýg», Asia Trafo mekemeleri, «Magným, «Fırkan» sekildi iri saýda jelileri jáne qaladaǵy arnaýly ekonomıkalyq aımaqtaǵy kásiporyndar, mektepter, balabaqshalar – jalpy 50-ge jýyq jumys berýshi mekemege medısına, tehnıka jáne pedagogıka salasynyń mamandary qajet. Qalalyq jumyspen qamtý jáne áleýmettik qorǵaý basqarmasynyń basshysy Balmarjan Narbekova osyndaı sharalar jumyssyzdyqty azaıtýǵa septigin tıgizetinin aıtady. «Jármeńkege 14 pen 29 aralyǵyndaǵy jastar, kvota sheńberinde basqa da jerlesterimiz, oqý oryndarynyń túlekteri qatysty. Usynylǵan 9 myńǵa jýyq orynnyń ishinde 3 500-i – turaqty jumys orny. Bul – jastarǵa úlken múmkindik. Qazirgi tańda Shymkentte 3 200 jas jumyssyz retinde tirkelgen», deıdi basqarma basshysy.
Jármeńke nátıjesinde myńǵa jýyq jas jumysqa joldama aldy. Turaqty jumyspen – 790, al «Jastar praktıkasymen» 121 jas jumys istemek. Jármeńkede, sonymen qatar, elimizdiń soltústik óńirine qonys aýdarý boıynsha aqparattyq-túsindirme jumystary uıymdastyrylyp, nátıjesinde 100-den asa shymkenttik soltústik óńirlerge kóshýge qyzyǵýshylyq tanytty.
Jyl basynan beri «Eńbek» memlekettik baǵdarlamasy sheńberinde 18 myńnan astam shymkenttik jumyspen qamtý sharalaryna qatysqan. Onyń ishinde 2 384 jas – «Jastar praktıkasymen», al 109-y «Alǵashqy jumys orny» jobasymen jumysqa joldanǵan. Osy arada aıta ketelik, Shymkentte jumysqa alǵash ret ornalasatyn, eńbek tájirıbesi joq jastardy qoldaý maqsatynda «Alǵashqy jumys orny» jobasy júrgizilýde. Búginge deıin jobaǵa qatysýǵa 109 jas nıet bildirip, qazirgi tańda óz mamandyǵy boıynsha túrli mekemeler men kásiporyndarǵa joldanyp, eki jylǵa turaqty jumysqa ornalasty. Joba «Nátıjeli jumyspen qamtýdy jáne jappaı kásipkerlikti damytýdyń» 2017-2021 jyldarǵa arnalǵan «Eńbek» memlekettik baǵdarlamasynyń III baǵyty aıasynda júzege asyrylyp otyr. Jumyspen qamtý ortalyǵy jumys berýshilermen kelisimshart jasap, oqý ornyn endi támamdaǵan jastar 24 aı jumyspen qamtylady. Jobaǵa qatysýshynyń eńbekaqysy – 20 AEK. Halyqty jumyspen qamtý ortalyǵy alǵashqy 12 aıdyń eńbekaqysyn sýbsıdııalaıdy.
