Bıylǵy qýańshylyqqa qaramastan maqtaly aýdandardyń sharýalary aǵyn sýdy artyǵymen aldy. Byltyrdan beri alǵash ret ońtústik óńiriniń sharýalary egistikke kedergisiz aǵyn sý ala bastady. Nátıjesinde, maqta terimi rekordtyq kórsetkishke jetti. Bul jetistikterdi dıqandar eki el arasyndaǵy ózara yntymaqtastyq baılanystardyń nyǵaıa túsýiniń nátıjesi retinde baǵalaýda. Túrkistan oblysyna arnaıy kelgen О́zbekstan Respýblıkasynyń Tótenshe jaǵdaılar mınıstri, Prezıdent keńesshisi Tursynhan Qudaıbergenov pen Sý sharýashylyǵy mınıstri Shavkat Hamraev bastaǵan delegasııa aýyl sharýashylyǵy salasyna serpilis ákelgen ózgeristerge kýá bolyp, maqtaly aýdandardyń sharýalarymen kezdesti. Mártebeli qonaqtar elimizdiń Ekologııa, geologııa jáne tabıǵı resýrstar mınıstri Serikqalı Brekeshov jáne Túrkistan oblysynyń ákimi О́mirzaq Shókeevpen birge maqtaaraldyqtardyń tynys-tirshiligimen tanysty. Arnaıy delegasııa «Almat» sharýa qojalyǵynyń maqta terim alqabynda boldy. Aǵyn sýdy bıyl artyǵymen paıdalanǵan sharýalar mol ónim alýǵa nıetti. Sondaı-aq óńirde maqta baǵasy ótken jylmen salystyrǵanda eki ese ósti. Oblysta 18 maqta óńdeý zaýytynyń 200-den astam qabyldaý beketi arqyly 1 tonna shıtti maqta 300 myń teńgeden qabyldanýda. Búginde josparlanǵan egis kóleminiń 33 myń gektary terilip, 70 myń tonnadan astam ónim jınaldy.
«Byltyr ózbekstandyq tehnıkanyń kómegimen sel basqan egistik alqabyna maqtaaraldyqtar maqta dánin qaıta seýip aldy. Kórshi aǵaıyndar tehnıkadan bólek, janar-jaǵarmaıyn, surypty shıtin de tegin berip otyrdy. Sol kezde shyǵynǵa ushyraǵan sharýalar úshin bul óte úlken kómek boldy. Kúndiz-túni tynbaı eńbek etkenniń nátıjesinde bıyl maqta bitik shyqty. Baǵa da kóterildi. Qazir kılosyn 300-320 teńgeden satyp jatyrmyz. Kórshi О́zbekstan elimen kelisimge kelip, aǵyn sýdy artyǵymen aldyq. Osynyń barlyǵy kórshi elmen ornaǵan dostyq qatynas arqyly júzege asyrylyp jatqanyn bilemiz. Memleket qoldaýymen tyńaıtqysh pen janar-jaǵarmaı jetkilikti. El rıza. Dıqandar tabysyn arttyratyn boldy», deıdi «Baǵdat» sharýa qojalyǵynyń basshysy Dáýletbaı Jorymbetov.
Bıyl 110 myń gektardan 280 myń tonna shıtti maqta terý josparlanǵan. Maqta talshyǵy Eýropaǵa eksporttalady. Sonymen qatar jıyn-terin jumystaryna 43 myń tonna janar-jaǵarmaı bólingen. Onyń baǵasy lıtrine 172 teńgeden bosatylýda.
О́zbekstannan kelgen delegasııa, sondaı-aq Myrzakent jańa shaǵyn aýdanynda salynǵan 1 200 oryndyq mektep qurylysymen tanysty. Onda ornatylǵan zamanaýı qondyrǵylar men mektepte engizilgen jańa jobanyń múmkindikterin joǵary baǵalady.
«El-jurttyń amandyǵyn kórip, osyndaǵy jaqsy ózgeristerge qýanyp turmyz. Qıyndyqty eńserip, birlik pen eńbektiń nátıjesinde Myrzakent zamanaýı ortalyqqa aınalypty», dedi О́zbekstan Respýblıkasynyń Tótenshe jaǵdaılar mınıstri T.Hýdaıbergenov.
О́z kezeginde oblys ákimi О́.Shókeev byltyr bolǵan tótenshe jaǵdaı baýyrlas eki el úshin de ońaıǵa soqpaǵanyn aıtyp ótti. «О́zderińizge belgili, jaǵdaıdy estip, maqtaaraldyqtardyń taǵdyryna alańdaǵan elimizdiń Tuńǵysh Prezıdenti – Elbasy Nursultan Nazarbaevtyń qoldaýymen, Memleket basshysy Qasym-Jomart Toqaevtyń tikeleı baqylaýymen Maqtaaralǵa memlekettik deńgeıde qoldaý kórsetildi. Birde-bir adam qamqorlyqsyz qalmady. Búkil el bolyp kómek qolyn sozdy. Tasqyn sýdyń zardabyn joıýǵa kórshi О́zbekstan elinen kómek kelip, qoıan-qoltyq jumys istedik. Baýyrlas ózbek halqymen jarqyn kezeńder men synaq sátterde de birgemiz. «Birligi bekem el bárin jeńedi» demekshi, bul synaq halqymyzdyń birtutas eldiginiń aıqyn dáleli boldy. Qıyn sátter artta qalyp, ár otbasyna tek baqytty kúnder buıyrsyn», dedi oblys ákimi.
Jańa mektepke jınalǵan myrzashóldikter turǵyndardyń qıyn kezde jaıly turmys izdep, basqa jaqqa údere kóshpegenin qýana aıtty. «Qıyndyqtar umytylyp, týǵan ólkemiz burynǵydan da gúldenip keledi. Qanshama jańa ǵımarattar, emdeý mekemeleri salyndy. Aınala kókke oranyp, aýdanymyz ajarlana tústi. О́zbekstan halqymen ǵasyrlar boıy birge ósip kelemiz. Ol jaqta aǵaıyn-týys turady. Bir ózennen sý iship, bir aýamen tynystaǵan týys halyqpyz. Qıyndyqta kómek berip, qýanyshymyzdy da bólisip otyr», deıdi Myrzakent aýylynyń turǵyny Shahzada Qurbanbaeva.
Sondaı-aq О́zbekstannan kelgen arnaıy delegasııa Jetisaı qalasyndaǵy «Qydyr ata» jekemenshik emhanasynyń jumysymen tanysty. Zamanaýı jabdyqtalǵan medısınalyq mekemede 120 emdelýshi em qabyldaı alady. Klınıka dárigerleri 100 shaqyrym jerde ornalasqan tashkenttik áriptesterimen tájirıbe almasyp otyrady.
Túrkistan oblysy
