Úshinshi megapolıstegi kınoındýstrııa salasyna úlken mán berip, daryndy jastardyń shyǵarmashylyǵyna qoldaý kórsetý arqyly múmkindik beretin shyǵarmashylyq alań qurýdy maqsat etken festıval jeńimpazdaryn marapattaý rásimine qatysqan qala ákiminiń birinshi orynbasary Shyńǵys Muqan jas talanttarǵa shyǵarmashylyq tabys tiledi. «Júldeli oryn alǵan 4 fılmdi kórermendermen birge tamashaladyq. Jas rejısserlerdiń aıaq alysy jaman emes. Bıyl bul baıqaý Shymkentte besinshi ret uıymdastyrylyp otyr. Jastarymyz osyndaı qarqynda eńbektenip, izdene tússe qalamyzdan áli talaı myqty kınorejısserler shyǵatyny sózsiz. Osyndaı shaǵyn kınofestıvalder olardyń tanylyp, shyńdala túsýine jol ashady dep senemiz», dedi qala ákiminiń birinshi orynbasary.
Baıqaýǵa qatysýǵa 30 úmitker nıet bildirip, qazylar alqasy sonyń ishinen 10 kınotýyndyny iriktep alǵan. Qazylar alqasy músheleriniń aıtýynsha, baıqaý qatysýshylary jastyǵyna qaramastan qoǵamdaǵy kókeıkesti máselelerdi fılmderine arqaý ete alǵan. Olar jas rejısserlerdiń eńbeginde árbir beınesıýjettiń taqyryptyq ıdeıasynyń ereksheligine jáne eńbektiń janrlyq talaptarǵa saı bolýyna aıryqsha mán bergenderin aıtady.
Baıqaý qorytyndysy boıynsha úshinshi oryndy Ersultan Tileýovtiń «Tańdaý» týyndysy ıelendi. Ekinshi oryn Dmıtrıı Vladımırovıchtiń enshisinde («Jetistik» fılmi). Al birinshi oryn «Sadaqa» fılminiń rejısseri Bolat Qojahmetke buıyrsa, bas júldege «Áke» fılminiń rejısseri Erdáýlet Alıbekov ıe boldy. Festıval buǵan deıin «Samǵaý» degen ataýmen Shymkentte 5 jyl qatarynan ótkizilgenin aıta ketelik. Eldegi epıdahýaldyń kúrdelenýine baılanysty ýaqytsha toqtaǵanymen bıyl Shymkent nomad film fest qysqametrajdy fılmder festıvali ataýymen qaıta bastaý aldy.
