Python baǵdarlamalaý tilindegi qosymsha sýrettegi\fotodaǵy jazýdy jáne daýysty mátinge aınaldyrady. Oqýshynyń aıtýynsha, vırtýaldy assıstent jáne mátindi tanýǵa arnalǵan skaner qulaǵy kemis adamdardyń ómirin jeńildetip qana qoımaı, smartfon qoldanýshylarynyń kúndelikti ómirinde de septigin tıgizedi.
«Meniń oıymsha, usynylǵan joba qoǵam úshin paıdaly bolmaq: múmkindigi shekteýli adamdar úshin de, qarapaıym paıdalanýshylarǵa da. Olar mátindi qolmen terip otyrmaı, ony jaı ǵana dybystasa bolǵany. Sondaı-aq mobıldi qosymshada mátindi sol ýaqytta aýdarý fýnksııasy qarastyrylǵan. Vırtýaldy assıstent barlyǵy 20 shaqty fýnksııany oryndaıdy», deıdi joba avtory.
Oqýshynyń jumysy Qazaqstan Táýelsizdiginiń 30 jyldyǵyna arnalǵan NIS oqýshylar arasyndaǵy «Týǵan elge taǵzym» jelilik baıqaýynda joǵary baǵalanǵanyn aıta ketý qajet. Ol 21 mektepten kelgen 46 úzdik jumystyń ishinde top jardy.
«Baıqaý tek jaqsy áser qaldyrdy: ózimniń jeke jobamdy tanystyryp qana qoımaı, onyń artyqshylyqtary men kemshilikterin kórýge múmkindik aldym», dep bólisedi jeńimpaz.
Jas novatordyń aıtýynsha, bolashaqta ol qosymshany Play Market jáne App Store platformalarynda iske qosýdy jáne zaǵıp adamdarǵa arnalǵan fýnksııalardy qosýdy josparlap otyr.
Dúnıejúzilik densaýlyq saqtaý uıymynyń málimetinshe, álemde adamdardyń 5%-nan astamy estý qabiletinen zardap shegedi. Al, elimizde olardyń sany 150 myńǵa jýyq.
