Jıyrmaǵa endi ilikken jasynda kóldeneń keselge kezikken. Sol qolyna jara shyǵyp, ıyqtan sál tómen kesýge týra kelgende mynaý jalǵannyń túk qyzyǵy qalmaǵandaı, tún artynan kún shyqpastaı qatty nalyǵan. Ýaqyt ta toqtap qalǵandaı. Áldekimniń aldynda keshirimge jatpaıtyn kúnási bolǵandaı kisi kózine túsýge qymsyndy. Beıtanystar kóz suǵyn qadap, tańyrqap qaraıtyndaı. Qaraǵany eshteńe emes qoı, kóptiń kózinshe taqaqtap, ózderine túk qatysy bolmasa da máseleniń mán-jaıyn bilgisi kelip suraıtyndary qınady. Eski jaranyń aýzyn tyrnaıtyndar da bar eken. Birte-birte eti úırengen. Áıtse de áli kúnge deıin beıtanys toptyń ishine túskisi kelmeıdi.
Kóńilin aýlaıyn dedi me, kim bilsin, alǵashqy bette et jaqyn týys pen janashyr jora-joldas qonaqqa kóp shaqyratyn. Aýzyna túsken sebebin aıtyp, at-tonyn ala qashatyn. Taǵdyrdyń salǵan isine shara bar ma, kóndi, kóndiktirdi. Keıin qysylmaıtyn boldy. Sóıtse ómirdiń ózi osyndaı qatygez synaqtan turady eken ǵoı. Bul da bir er jigittiń basyna kelgen, tózimi men jigerin synamaqshy bolǵan emtıhan ispetti. Kún ótken saıyn qaraǵaıdyń qarsy bitken butaǵyndaı bekı tústi. Sportty serik etýge bel býdy. Sport densaýlyǵy kemniń ǵana emes, tepse temir úzetin atpal azamattarǵa da qajet ekenine daý joq qoı. Al tirek-qımyl apparaty zaqymdanǵandar úshin tipti aýadaı qajet. Tek jaǵdaı jasala bermeıtini janǵa batady. Respýblıkalyq saıystarǵa oblystan komanda jınaqtaǵanda kózboıaýshylyqtyń oryn alatynyn kórip júr. Jattyǵyp júrmese de, sporttyq qural-jabdyqtary talapqa saı bolmasa da qatysty degen aty bolsyn dep kógendegen qoıdaı muryndarynan tizip apara beredi. Jarystan keıin jan balasy izdemeıtini taǵy bar.
Respýblıkalyq altynshy spartakıadadan oralǵan, komandalyq esep boıynsha top jaryp, sport sheberi atanǵan Erjan Jaqanovpen kezdesip, jeńisine qutty bolsyn aıtyp, az-kem sóılestik. Ústel tennısinen ótkizilgen jarysqa tirek-qımyl apparaty zaqymdanǵan 10 sportshy qatysty.
– Eki jumadaı qalǵanda jurttyń bárine jalynyp júrip jattyǵý zalynyń kiltin surap aldym, – deıdi Erjan Qaıyrgeldiuly, – jattyqtyrýshymyz joq. Bul arada aıta ketetin bir jaıt, jattyqtyrýshynyń eńbekaqysynyń azdyǵy. Byltyr Aqtóbeden jattyqtyrýshy kelgende bórkimizdi aspanǵa atyp qýanǵan edik, kópke shydamady, ketip qaldy. Keıin bilsek, jalaqysy nebári 100 myń teńge tóńireginde eken. Oǵan da kiná joq, baspanasy bolmaǵandyqtan páter jaldap turýǵa májbúr boldy. Jaldaý quny 100 myń teńge shamasynda. Bizge qansha búıregi buryp tursa da, adamdy turmys bıleıdi emes pe? Respýblıkalyq ústel tennısi federasııasy azdap kómek qolyn sozǵanymen, ǵımarat jekemenshiktiki. Oblystyq sport basqarmasy jalǵa alyp otyr. Ondaǵylar biz tárizdi adamdardyń jattyǵýyn hosh kóre bermeıdi. Aıtatyn ýájderi: «dońǵalaqty arbalaryńmen edenniń tósenishin jyrtasyńdar». Osy joly spartakıadaǵa barǵanda basqa oblystardan kelgen ózimiz tárizdi sportshylardyń hal-ahýalyn surastyrdyq, olarda dál osyndaı spartakıadada júldeli bolyp, birinshi oryn alǵan sportshylarǵa 200, ekinshi orynǵa 150, úshinshi orynǵa 100 myń teńge stıpendııa taǵaıyndalady eken.
Dál osyndaı qoldaý bolyp jatsa, sportshylardyń da kúnkórisi kóp-kórim jaqsaryp qalar edi. Aıtpaqshy, Kókshetaýdan barǵan komandanyń ishinde nysana kózdeýshilerdiń arasynda qolyna myltyq ustap kórmegenderi de bar eken. Tipti, elektrondy tablonyń ne kórsetip turǵanyn aıyra almaıdy. Sonyń ózinde bir sportshy fınalǵa ilikken. Aıtýlaryna qaraǵanda, eldiń bári, ár komanda birkelki ıne-jipten jańa shyqqan sport kostıýmderin kıip, jarqyrap júrgende, bular árqaısysy ártúrli, ala-qula kıimmen qatysyp, kóńilderi pás bolǵan. Áıtse de, namysqa tyrysyp baǵypty.
– Ashat Tájmıev ekeýimiz Qazaqstan Respýblıkasynyń chempıony atandyq, – deıdi Erjan Qaıyrgeldiuly, – arnaıy forma satyp alýǵa qarajat tapshy. Qoltyǵyńnan demer demeýshi izdeýge namysymyz jibermeıdi. О́zi arzan da dúnıe emes. Raketkanyń ózi 90 myń teńgeniń tóńireginde.
Búginde oblystyq kitaphananyń uıymdastyrý bóliminiń jetekshisi bolyp qyzmet etetin keıipkerimiz oblys ortalyǵynda Abaı Myrzahmetov atyndaǵy ýnıversıtetti bitirgen ekonomıst tórt birdeı perzentin tárbıelep otyr. Endigi armany oblys ortalyǵynda ózi tárizdi taǵdyr tálkegine ushyraǵan adamdarǵa azdaǵan janashyrlyq jasalsa.
Pendeni alǵa jeteleıtin úmit shyraǵy. Ázirge laýlap janyp tur.
