Brekeshevtiń aıtýynsha, ulttyq joba 4 negizgi baǵytty qamtıdy.
Birinshi baǵyt - «Taza Qazaqstan» atmosferalyq aýa sapasyn jaqsartý, qaldyqtardy basqarý jáne elimizdiń sý obektileriniń ekojúıelerin saqtaý sııaqty negizgi ekologııalyq problemalardy sheshýge yqpal etedi.
«Baǵyt sheńberinde 16 iri ónerkásip kásiporyndaryndaǵy shyǵaryndylardy 5 jyl ishinde 20%-ǵa qysqartý boljanyp otyr. Bólek jınaý úshin 8 myńnan astam konteıner ornatý, QTQ-nyń úlesi men kádege jaratylýyn 18%-dan 34%-ǵa deıin arttyrý josparlanýda. Sý obektileriniń ekojúıelerin saqtaý bóliginde «Syrdarııa ózeniniń arnasyn retteý jáne Aral teńiziniń soltústik bóligin saqtaý» jobasynyń ekinshi kezeńin iske asyrý josparlanýda», dedi ol.
Ekinshi baǵyt - «Únemdi Qazaqstan». «Sýdy únemdi paıdalaný esebinen ónimdilikti arttyrý» mindeti sheńberinde 401 arnany rekonstrýksııalaý jáne 212 arnany sıfrlandyrý esebinen sýarý kezinde sý shyǵynyn 4 km3 qysqartý josparlanýda.
«Ulttyq jobada sýarmaly jerlerdi 600 myń gektarǵa ulǵaıtý boıynsha is-sharalar kózdelgen, qosymsha sýarý kózderin qurý úshin 2025 jylǵa deıin Aqmola, Batys Qazaqstan, Jambyl, Qyzylorda jáne Túrkistan oblystarynda jınaqtaý kólemi 1,7 km3 bolatyn 9 jańa sý qoımasyn salý josparlanýda. Atalǵan baǵyt aıasyndaǵy ekinshi mindet - ónerkásiptik kásiporyndardyń tehnologııalyq jabdyqtaryn jańǵyrtý jáne bıýdjet sektoryndaǵy jaryqtandyrýdy jańǵyrtý esebinen energııa tıimdiligin arttyrý», dep atap ótti Ekologııa mınıstrliginiń basshysy.
Budan ári «Tabıǵat» baǵyty aıasynda Memleket basshysynyń ómir súrý deńgeıi 65%-dan kem emes 2 mlrd aǵash otyrǵyzý jónindegi tapsyrmasyn iske asyrý jáne sırek kezdesetin jáne joıylyp bara jatqan janýarlar túrleriniń sanyn qalpyna keltirý jónindegi is-sharalardy júrgizý kózdelip otyr.
«Tórtinshi baǵyt - «Ekologııa bolashaǵy» halyqtyń ekoqurylymy men mádenıetiniń deńgeıin arttyrýǵa baǵyttalǵan», dedi ol.
Mınıstr ulttyq jobany iske asyrý halyq úshin qolaıly ómir súrý ortasyn qurýǵa jáne ekologııalyq jaǵdaıdy jaqsartýǵa, qaldyqtardy qaıta óńdeý jáne ekologııalyq qaýipsiz kádege jaratý ınfraqurylymyn qurýǵa múmkindik beretinin atap ótti.
