Koronavırýs ekpini elge jetpeı turǵan jaımashýaq kezde keıbir shendilerdiń suraqqa jaýap bere almaı kibirtiktegen, qazaq tilinde sóıleı almaı tutyqqan, odan qala berdi mańyzdy jıyndarda maýjyrap uıyqtap otyrǵan sátteri aqparat quraldary arqyly talaı jalpaq jurtqa jarııa bolǵany málim. Bul el aldynda júrgen shendilerdiń ózderine de sabaq bolǵany anyq. Al koronavırýstyń taralýyna baılanysty kúndelikti ómirimizge kúrt ózgeris endi. Tirshilikti qamtamasyz etetin tótenshe qyzmet ókilderinen basqasy túgel onlaınǵa kóshti. Jýrnalıster de burynǵydaı mınıstr, depýtat, memlekettik qyzmetshimen betpe-bet júzdesip, suraǵyn tike qoıa almaı, armanda qaldy. BAQ ókilderi men sheneýnikter arasyndaǵy tikeleı baılanystyń úzilýi, ásirese koronavırýstyń alǵashqy jylynda aıryqsha baıqaldy. Elge endi kelgen beımálim aýrýdan esi shyqqan el qalaı emdelerin, dári-dármekti qaıdan alatynyn bilmeı sasqalaqtady. Sanany sansyratqan saýal kóp, biraq jaýap joq. Sol kezde jýrnalıster men mekemelerdiń baspasóz hatshylary otyratyn áleýmettik jeli chattary tipten dúrligip ketti. «Meniń suraǵyma nege jaýap joq, saýaldardy nege irikteısizder? Qalaǵan suraqtarǵa ǵana jaýap berip, qalǵanyna jaýap joq pa ne?» degen áriptesterimizdiń shaǵymy tolastamaı jatty. Mine, sol jyldan bastap, jýrnalıster sheneýnikterdiń bet-júzin betpe-bet kórý «baqytynan» qaǵyldy. Áli kúnge memlekettik organ ókilderimen ótetin brıfıng, baspasóz konferensııalary, basqa da jıyndar túgel qashyqtan ótedi. Jýrnalıst sheneýnikke qoıar saýalyn tek jazbasha joldaıdy. Tikeleı efır kezinde mınıstrlik ókilderi kelgen suraqtyń bárine birdeı jaýap bere bermeıdi. Shý da osydan shyǵady. Ýaqyttyń azdyǵyn syltaýratyp, sheneýnikter belgili bir suraqtarǵa ǵana jaýap beredi. Qalǵanyna «jazbasha jaýap beremiz» deýmen shekteledi. Quddy shendiler ózderiniń qolaıyna jaǵatyn saýaldarǵa ǵana jaýap berip, «shymbaıyna batatyn qıyn» suraqtardy ádeıi elemeı tastaıtyndaı seziledi. Bul bul ma, áriptesterimiz jańadan saılanǵan depýtattardy jyǵa tanı qoımaıdy. О́ıtkeni olar saılanǵaly – karantınde. Telefonmen ǵana tildesetinimiz bar. Kezige alsaq, báriniń aýzynda – maska. «Jańadan saılanǵan depýtattar jýrnalısterdiń súzgisinen ótken joq» dep áriptesterimizdiń ázildeıtini de sondyqtan.
Jýrnalıster kóterip júrgen osy másele Úkimettiń, Parlamenttiń baspasóz hatshylary otyratyn jýrnalıster chattarynda áli kóterilip keledi. Tipti áriptesterimiz bıylǵy sáýir aıynda BAQ ókilderin memlekettik organdarǵa kirgizý jóninde Prezıdent Qasym-Jomart Toqaevqa ashyq hat ta joldady. Jaqynda Premer-Mınıstrdiń orynbasary Eraly Toǵjanov qatysqan brıfıngte áriptesterimiz osy máseleni taǵy kóterdi. Onyń aıtýynsha, jýrnalısterge qoıylǵan karantındik shekteýler senzýra emes jáne aqparatqa qol jetkizýge kedergi bolyp sanalmaıdy. Úkimette, Parlamentte ótip jatqan búkil otyrys onlaın translıasııalanady. «Aqparatqa qoljetimdilik betpe-bet kezdesýmen shektelmeıdi, ózge de tolyp jatqan múmkindikter bar. Bul jazbasha saýal joldaý, jýrnalısterdiń tikeleı habarlasýy, sondaı-aq onlaın kezdesýler men brıfıngter, elektrondy úkimet pen áleýmettik resýrstar arqyly keri baılanys», dedi ol.
Degenmen de jýrnalısterdiń vıse-premerge qoıǵan suraǵy qamshy boldy ma, sodan keıin Ortalyq kommýnıkasııalar qyzmeti brıfıngti oflaın rejiminde ótkizdi. Bul – koronavırýsqa baılanysty karantın shekteýinen keıingi osy alańda ótken alǵashqy betpe-bet jıyn boldy.
Álbette, jýrnalıster sheneýnikterdiń júzin kórýge emes, olardyń óz aýzynan suraqtaryna jaýap alýǵa, saýalyn tike qoıýǵa asyǵyp otyr. Sondyqtan tek jýrnalısterge esigi tars jabylǵan Parlament pen Úkimet úıi «jibip», esigin qaıta aıqara ashady degen úmittemiz. Aıtpaqshy, nebir tulǵalarmen kezdesip, túrli resmı jıyndarǵa qatysyp, aqparat taratatyn jýrnalısterdiń barlyǵy derlik koronavırýsqa qarsy vaksına alǵan. Ashyq qosymshasyndaǵy mártebesi – jasyl. Demek, sanıtarlyq-epıdemııalyq jaǵynan da barlyq talapqa saı keledi.
