Aımaqtar • 14 Qazan, 2021

Ahań mýzeıi qala qamqorlyǵyna alyndy

626 ret kórsetildi

Alashtyń aıaýly perzenti Ahmet Baıtursynulynyń turǵan mýzeı-úıi áli kún­ge memleket qara­ma­ǵyna ótpegeni, turaqty qar­jylandyrý kózi bolma­ǵasyn tarıhı nysannyń jaǵdaıy múshkil ekendigi buǵan deıin san márte aıtylyp-jazylǵan bola­tyn. Tuǵyrly tulǵa­nyń 150 jyldyq mereıtoıy qarsańynda jurt­shy­lyqty alańdatqan jaıdyń túıini tarqap, mýzeı qala qamqorlyǵyna ótti.

1988 jyly Ahań esimi aqtal­ǵannan keıin Almatyda qaıratker turǵan úıler izdes­tirile bastady. Sol tusta bul oryndardy Sholp­an Ah­met­qyzy, Gúlnar Mir­­jaqyp­qyzy, Danabıke Qa­raldınalar anyq­tap bergen. Ahmet Baı­tur­syn­uly turdy degen úsh úı ta­bylǵanymen, onyń ekeýiniń ornyna jańa qurylys nysandary salynyp ketken. Al bul úıde Ahmet Baıtursynuly 1934-1937 jyldar aralyǵynda qyzy Sholpannyń qolynda tur­ǵan. Ahańnyń kózindeı bol­ǵan jádiger qaıratkerdiń óz aty­men atalatyn kóshede orna­lasqan.

 Aqjoltaı jańalyqty qala ákimi Baqytjan Saǵyntaev habarlap, murajaı-úıdi qoǵamdyq qordan kommýnaldyq menshikke berý týraly qaýlyny mýzeıge tabystady.

«Ahmet Baıtursynuly mýzeı-úıiniń keshege deıin she­­shil­megen máseleleri kóp bol­dy. 1995 jyly A.Baıtur­syn­­uly atyndaǵy qoǵamdyq qor­dyń qaramaǵyna berilgen mura­jaıdyń ǵylymı-mádenı damýynda kóp múmkinshilikter bol­maǵanyn jasyra almaımyz. Qoǵamdyq qordyń nysandy us­tap otyratyndaı qaýqary joq edi. Sol sebepti de qaıratkerdiń ult úshin jasaǵan qyzmetterin negiz ete otyryp, arymen qyzmet etken tulǵanyń mem­lekettik qaıratker ekenin eskersek, bul kisiniń artynda qalǵan taǵy­lym mektebi jekemenshikke berilýi óreskel qate edi. Osy qateni túzeý úshin 2002 jyldan beri BAQ-betinde másele kóte­rilip keldi. Ahań murasyna alańdaǵan zııaly qaýym da bul jaıǵa ún qosty. Arada 19 jyl ótkennen keıin talap eskerilip, sol qaýly qolymyzǵa tıip otyr», deıdi Ahmet Baıtursynuly mura­jaı-úıiniń dırektory Raıhan Imahanbet.

Keler jyly kórnekti aǵartý­shynyń týǵanyna 150 jyl tolady. Mereıtoıǵa daıyndyq barysynda qoǵam qaıratkeri turǵan murajaı-úıdiń aıryqsha qamqorlyqqa alyn­ǵany qýa­nysh­ty jaıt. HH ǵa­syr­dyń basynda salynǵan mu­rajaı ǵımaraty respýblıkalyq mańyzy bar tarıh jáne mádenıet eskertkishteriniń memlekettik tizi­mine engizilgen. Ǵımarattyń jalpy aýdany – 160 sh. m. Murajaı 1993 jyly qu­ryldy jáne 1998 jy­ly resmı túrde ashyldy. Munda A.Baıtursynulynyń ómiri men shy­­ǵar­­mashylyǵyna qatysty 500-ge jý­yq qundy materıal saq­tal­­ǵan.

Sońǵy jańalyqtar

Uqsas jańalyqtar