Jıynǵa, Qazaqstan Respýblıkasy Parlamenti Májilisiniń depýtattary, memlekettik jáne quqyq qorǵaý organdarynyń ókilderi qatysty.
Plenarlyq otyrystan keıin konferensııa «Kópetnosty eldi mekenderdegi áleýmettik problemalardy sheshýdegi jergilikti atqarýshy organdar men azamattyq ınstıtýttardyń róli», «Shıelenister men narazylyq kóńil-kúılerdi aldyn alý jáne olardy eskertý», «Mýltımádenı ortadaǵy qaqtyǵystardyń aldyn alý isine ǵylymı-saraptamalyq áleýetti paıdalaný», «Qoǵamdyq kelisimdi nyǵaıtýdaǵy Qazaqstan halqy Assambleıasy men BAQ-tyń róli» sekildi jekelegen seksııalar sheńberinde jalǵasty. Eki kún ishinde konferensııada 40-qa jýyq otandyq jáne sheteldik spıkerler baıandama jasady.
Talqylaý qorytyndysy boıynsha konferensııaǵa qatysýshylar etnosaralyq kelisimdi nyǵaıtý boıynsha jergilikti atqarýshy organdarǵa arnalǵan usynymdar kórsetilgen qarar qabyldady. Atap aıtqanda, konferensııaǵa qatysýshylar «Beıbitshilik pen kelisim» jobasyn júzege asyrý boıynsha Jambyl oblysynyń tájirıbesin taratý kerektigin usyndy.
— QR Tuńǵysh Prezıdenti - Elbasy Nursultan Nazarbaev turaqtylyq pen kelisim – bul urpaqtan urpaqqa jalǵasýy tıis qundylyq ekenin atap ótken bolatyn. Elbasy júıeli baǵytynyń negizinde bizdiń elimizde etnostardyń mádenıetin, tilderi men dástúrlerin damytý úshin barlyq jaǵdaı jasaldy. Memleket basshysy Qasym-Jomart Toqaevtyń bastamasymen qolǵa alynǵan «Beıbitshilik pen kelisim» pılottyq jobasy qoǵamdyq kelisimdi nyǵaıtýǵa óz úlesin qosýda. Etnomádenı birlestiktermen birlese otyryp, biz qoǵamda ózara syılastyq, tózimdilik, ultaralyq jáne dinaralyq kelisim ıdeıalaryn nyǵaıtýǵa kúsh salýdamyz. Nátıjesinde, joba sheteldik sarapshylardyń joǵary baǵasyna ıe boldy. Konferensııa barysynda kóterilgen barlyq usynystaryńyz mindetti túrde eskeriletin bolady. Konferensııa qorytyndysy boıynsha baıandamalar jınaǵy shyǵarylady. Konferensııanyń túrli ulttardyń ókilderi shoǵyrlanǵan bizdiń óńirde ótýiniń ózindik máni zor. Taraz – tarıhy tereń, órkenıetke oshaǵyna aınalǵan qala. Qazaq jerinde Uly Jibek joly zamanynan bergi barlyq kartalarda kórinis tapqan eki qala bar, olar – Taraz jáne Jarkent. Eger elimizde IýNESKO tizimine engen 11 nysan bolsa, olardyń beseýi Jambyl oblysynda ornalasqan, - dep atap ótti Jambyl oblysynyń ákimi Berdibek Saparbaev.
Taraz qalasyndaǵy halyqaralyq konferensııaǵa qatysqan sheteldik sarapshylar atalǵan issharanyń uıymdastyrylýyn joǵary baǵalap, Qazaqstannyń etnosaralyq qaqtyǵystardyń aldyn alý, retteý jáne sheshý máselelerindegi tájirıbesi el aýmaǵynda ǵana emes, odan tys memleketterde de biregeı jáne suranysqa ıe ekenin atap ótti.
- Konferensııa joǵary deńgeıde ótti, spıkerlerdiń ár sózi tyńdaýshylardyń úlken qyzyǵýshylyǵyn týdyrdy. Memleket qaıratkerleriniń belsene qatysqany qýantady. Bul eldegi ultaralyq qatynastar salasyna erekshe kóńil bólinetinin aıǵaǵy.
Qazaqstan Respýblıkasynyń Konstıtýsııasynda ultaralyq jáne konfessııaaralyq qatynastar salasyn retteıtin keshendi normalar bar. Qazaqstan halqy Assambleıasy – biregeı qoǵamdyq ınstıtýt jáne qoǵamnyń birigýinde orasan zor ról atqarady. QHA ókilderi qaıyrymdylyq sharalaryna belsendi atsalysýda. Osylaısha, ózara qoldaý, kómek kórsetý mádenıeti qalyptasýda, - deıdi áleýmettaný ǵylymdarynyń doktory, ýkraınalyq professor Vıktor Sherbına.
