Sút beziniń obyry – qaterli isiktiń eń kóp taralǵan túrleriniń biri. DDU statıstıkasy boıynsha, 2020 jyly álemde bul aýrýdyń 22 mln-nan astam jaǵdaıy tirkelgen. Sút beziniń qaterli isigi – onkologııaǵa shaldyqqan áıelder arasyndaǵy ólimniń basty sebebi. Tek 2020 jyly osy aýrýdan álemde 685 myń áıel qaıtys boldy.
«Sút beziniń qaterli isigi sút joldarynyń epıtelııi dep atalatyn jasýshalarda paıda bolady. Aldymen isik paıda bolady jáne tútikte nemese lobýlada ósedi. Bul ınvazıvti qaterli isik jáne eshqandaı belgileri bolmaıdy. Ýaqyt óte kele, nóldik satydaǵy qaterli isik ósip, sút bezderiniń ulpalaryn kóbeıtip, ınvazıvti sút beziniń qaterli isigine aınalady. Ári qaraı ol jaqyn mańdaǵy lımfa túıinderine taralady. Aımaqtyq metastaz, ári qaraı alys metastaz, ıaǵnı basqa organdarǵa ótý paıda bolady. Kóp jaǵdaıda áıel metastazdyń saldarynan qaıtys bolady. Biraq aýrý erte satysynda anyqtalsa, onda emdeý jaqsy áser etýi múmkin. Ádette sút beziniń qaterli isigi hırýrgııalyq operasııany, sáýlelik terapııany, hımıoterapııany jáne gormondardy qoldaný arqyly birge emdeledi», dedi J.Sadýova.
Sondaı-aq maman sút bezi qaterli isiginiń damý qaýpin uzaq ýaqyt bala emizý, turaqty dene shynyqtyrýmen aınalysý tómendetetinin aıtty.
«Salmaǵyńyzdy baqylaý da artyq bolmaıdy. Alkogol iship, temeki nemese oǵan uqsas zııandy zattardy shekpeńiz. Sol sııaqty garmondardy uzaq qoldanýdan da bas tartqanyńyz durys. Sút bezin únemi tekserip otyrý kerek, mammologqa ýaqytynda baryp, skrınıngten ótý qajet. Kóbinese sút beziniń qaterli isigi keýdedegi aýyrmaıtyn «túıinshek» nemese «domalaq» túrinde baıqalady. Eger keýdeńizde osyǵan uqsas birnárse shyǵyp, eshqandaı aýyrsyný bolmasa, dereý mamanǵa habarlasýyńyz qajet. Mundaı belgiler paıda bolǵannan keıin jaqyn arada medısınalyq kómekke júginý jyldam emdelýge yqpal etedi», dedi spıker.
Sút bezi qaterli isiginiń qandaı belgilerin aıtýǵa bolady? Bul keýdede túıinshektiń paıda bolýy ǵana emes, sonymen qatar sút bezderiniń mólsheri men formasynyń ózgerýi, ıaǵnı tartý, qyzarý, sút bezderiniń terisindegi jaralar men basqa da ózgeristerdiń paıda bolýy jáne t.b. Alaıda keýdege qandaı da bir túıinshek kenetten sezilse, úreılenbeńiz. Sebebi sút bezindegi túzilimderdiń 90%-y qaterli emes. Fıbroadenomalar, kıstalar, ınfeksııalar – bul jaqsy túzilimder.
