«Sıfrly saýattylyq» páni osy oqý jylynyń úshinshi toqsanynda oqý baǵdarlamasyna alǵash ret engiziledi. Negizi mundaı baǵyttaǵy pán bastaýysh synyptyń oqý baǵdarlamasynda burynnan bar. «Aqparattyq-kommýnıkasııalyq tehnologııalar» páni buǵan deıin oqýshylarǵa úshinshi synyptan bastap oqytylatyn. Mundaı ózgeristi tıisti mınıstrlik janyndaǵy Mektepke deıingi jáne orta bilim komıtetiniń tóraıymy Gúlmıra Kárimova jańa zamandaǵy ózgeristerdiń talabynan týyp otyrǵanyn jetkizdi.
«Oqý baǵdarlamasy suranys pen ýaqyt talaptaryna sáıkes bolýy tıis. Sıfrly álemniń qarqyndy damyp jatqanyn kórip otyrmyz. Qazir smartfondar men kompıýterlerdi mektepke deıingi balalar da paıdalanady. Sıfrly saýattylyq – oqý men jazý sııaqty negizgi daǵdylardyń birine aınalyp keledi. Sondyqtan balalardy sıfrly saýattylyq jáne aqparattyq qaýipsizdik negizderine múmkindiginshe erterek úıretý mańyzdy. Álbette, jańa pándi oqytý barysynda balalardyń jas erekshelikteri de eskeriledi», dedi G.Kárimova.
Osyǵan oraı 4-synypqa arnalǵan «Aqparattyq-kommýnıkasııalyq tehnologııalar» jáne 5-11 synyptarǵa arnalǵan «Informatıka» pánderi boıynsha oqý baǵdarlamalary qaıta qaralǵan. Jańashyldyqtar balalardyń aqparattyq tehnologııalar salasynda sapaly bilim alýyna baǵyttalyp otyr. Aıtalyq, mektep baǵdarlamasy sheńberinde eń tanymal Python baǵdarlamalaý tili oqytylmaq. 5-9 synyp oqýshylary 3D-modeldeý men 3D-prıntıng boıynsha bilim alady. Al 10-11 synyptardaǵy «Informatıka» páni boıynsha úlgilik oqý baǵdarlamasynda IT-STARTUP, vırtýaldy jáne tolyqtyrylǵan shynaıylyq, jasandy ıntellekt, mobıldi qosymshalardy ázirleý, BigData jáne taǵy basqa taqyryptar bar. Buǵan qosa barlyq synyptyń oqý baǵdarlamalaryna Internet jelisindegi qaýipsizdik erejeleri, avtorlyq quqyq týraly taqyryptar engizilgen.
