Aımaqtar • 22 Qazan, 2021

Jambylda esirtki daıyndap, satýmen aınalysqan qylmystyq top ustaldy

40 ret kórsetildi

Jambylda esirtki daıyndaýmen jáne ótkizýmen aınalysqan qylmystyq top ustaldy, dep habarlaıdy Egemen.kz.

Qylmystyq top respýblıkalyq «Qarasora-2021» jedel aldyn alý is-sharasy, sondaı-aq «Refleks-2021» óńirlik operasııasyn ótkizý barysynda anyqtaldy. Olardy Jambyl oblysy Polısııa departamenti Esirtki qylmysyna qarsy is-qımyl basqarmasynyń jáne Ulttyq qaýipsizdik komıteti departamentiniń qyzmetkerleri birlesip ustady.

Qylmystyq top Jambyl oblysynyń aýmaǵynda «marıhýana» daıyndaýmen jáne ony basqa óńirlerge satýmen aınalysqan. 39 jáne 51 jas aralyǵyndaǵy barlyǵy 5 kúdikti anyqtaldy. Atalǵan er adamdardyń tórteýi – Baızaq aýdanynyń turǵyndary, bireýi Taraz qalasynan.

«Olardyń turǵylyqty jeri boıynsha, sondaı-aq kúdiktilerdiń biriniń óndiristik bazasyna tintý jasap, bir mezgilde júrgizilgen ustaý operasııasy barysynda jalpy salmaǵy 1 keliden astam gashısh, 30 keliden asatyn marıhýana, ósirilgen kannabıs ósimdiginiń butalary, ıleýish quraly jáne gashısh óndirýge arnalǵan basqa da qurylǵylar, sondaı-aq tirkelmegen 2 tegis uńǵyly myltyq, 25 ańshylyq jáne 16 travmatıka patrondary tárkilendi. Qazirgi ýaqytta ustalǵandardyń barlyǵy kinásin moıyndady. Olar Taraz qalasy Polısııa basqarmasynyń ýaqytsha ustaý ızolıatoryna qamaldy»,  dep atap ótti Esirtki qylmysyna qarsy is-qımyl basqarmasynyń bastyǵy Asqar Jumabekov.

Atalǵan qylmystyq is boıynsha tájirıbeli qyzmetkerlerden jedel tergeý toby quryldy, sotqa deıingi tergeý amaldary júrgizilip jatyr.

Sońǵy jańalyqtar

Uqsas jańalyqtar