Prezıdent • 22 Qazan, 2021

Memleket basshysy Asqar Mamındi qabyldady

152 ret kórsetildi

Memleket basshysy Qasym-Jomart Toqaev Premer-Mınıstr Asqar Mamındi qabyldady, dep habarlaıdy Egemen.kz Aqordaǵa silteme jasap.

Prezıdent Qasym-Jomart Toqaevqa Qazaqstannyń ekonomıkalyq ósim qarqyny, áleýmettik mańyzy bar azyq-túlik baǵalaryn turaqtandyrý sharalary, eldegi sanıtarlyq-epıdemıologııalyq ahýal men basqa da ózekti máseleler týraly baıandaldy.

Memleket basshysy Qazaqstan ekonomıkasynyń qaıta qalpyna kelý úderisi qarqyndy júrip jatqanyn atap ótti. Bıylǵy 9 aıdyń qorytyndysy boıynsha ishki jalpy ónimniń ósimi 3,4 paıyzdy qurady. Der kezinde daǵdarysqa qarsy qabyldanǵan sharalardyń arqasynda ekonomıka qaıta qalpyna keldi.

Asqar Mamınniń málimetine sáıkes naqty sektordaǵy turaqty ósim 3,5 paıyzǵa ósti, sondaı-aq karantın shekteýlerin jeńildetý nátıjesinde qyzmet kórsetý sektorynyń birtindep qalpyna kelýi ekonomıkanyń qaıta ósýin údetti. Bul rette, óńdeýshi ónerkásiptegi óndiris kólemi 5,7 paıyzǵa artty. Qurylys salasy 9,7 paıyzǵa ulǵaıdy.

Elimizde 9 aıdyń ishinde 10,4 mıllıon sharshy metr turǵyn úı paıdalanýǵa berildi. Bul ótken jylǵy kórsetkishpen salystyrǵanda 8 paıyzǵa joǵary. Premer-Mınıstr Memleket basshysyna áleýmettik mańyzy bar taýarlardyń baǵasyn turaqtandyrý boıynsha júrgizilip jatqan jumystar men Inflıasııaǵa qarsy is-qımyl sharalarynyń júzege asyrylýy jóninde aıtty.

Úkimet agroónerkásip kesheni sektorynda qun qalyptastyrýdyń barlyq tizbegi boıynsha baǵany turaqtandyrý, saýda jelileri men otandyq taýar óndirýshileri arasynda uzaq merzimdi kelisimsharttar jasaý, taýar aınalymyn qarjylandyrýdy kóbeıtý jáne turaqtandyrý qoryna azyq-túlik satyp alýdy arttyrý, sondaı-aq áleýmettik mańyzy bar azyq-túliktiń saýda ústemesin joǵarylatý faktilerine jol bermeý sharalary qabyldanyp jatyr.

Budan bólek, Qasym-Jomart Toqaevqa elimizdegi sanıtarlyq-epıdemıologııalyq jaǵdaı jóninde aqparat berildi. Qazirgi tańda barlyq aımaqtarda koronavırýs juqtyrý deńgeıi tómendegen, aýyr naýqastardyń, stasıonarlarda jáne ambýlatorlyq em qabyldap jatqandardyń sany azaıǵan. Vırýstyń taralý ındeksi – 0,96. Juqpaly aýrýhanalardyń 37 paıyzynda, jansaqtaý bólimderiniń 31 paıyzynda naýqastar em alyp jatyr. 8,1 mıllıon adam ekpeniń birinshi komponentin, 7,2 mıllıon adam ekinshi komponentin alǵan.

Asqar Mamın Prezıdentke syrtqy jáne ishki ınvestısııalardyń kólemin arttyrý, shaǵyn jáne orta bıznestiń áleýetin ulǵaıtý, aımaqtardy órkendetý, óńdeýshi sektordy damytý jáne keńeıtý esebinen ekonomıkanyń qurylymdaryn odan ári ártaraptandyrý jóninde qabyldanyp jatqan sharalar, sondaı-aq elimizdiń áleýmettik-ekonomıkalyq damýynyń basqa da ózekti máseleleri boıynsha baıandady.

Sońǵy jańalyqtar

Jeńilisten keıingi jańa qadam

Kásipqoı boks • Búgin, 16:05

Belarýssııa referendým ótkizedi

Álem • Búgin, 13:05

30 soqqy – 1 gol

Fýtbol • Búgin, 12:51

Mýngııanyń armany – Golovkın

Kásipqoı boks • Búgin, 10:35

QazUÝ-da Táýelsizdiktiń onkúndigi bastaldy

Táýelsizdiktiń 30 jyldyǵy • Búgin, 09:55

«Qyzyl» aımaqta qalǵan jalǵyz-aq oblys

Koronavırýs • Búgin, 09:50

Qazaqstanda qansha adam vaksına saldyrdy

Koronavırýs • Búgin, 09:45

1137 adam koronavırýs indetinen saýyqty

Koronavırýs • Búgin, 09:30

Uqsas jańalyqtar