«Birinen keıin biri tolassyz túsip jatqan adamdardyń kóptigine qaramastan, medısına qyzmetkerleri birde-bir naýqasty nazardan tys qaldyrmaı, óbektep júrip ólim aýzynan alyp qalyp jatyr. О́z atymnan ǵana emes, indet tyrnaǵyna ilinip, gospıtalda emdelip, aıyǵyp, aman-esen úıine oralǵan barsha naýqastardyń atynan dárigerlerge alǵys aıtamyn! Gospıtalda bolyp jatqan ólim men ómirdiń arasyndaǵy arpalysty dárigerler men naýqastar ǵana biledi. О́z basym ókpem 25% zaqymdanyp 11-palatada jattym. Meni qoıshy, ózgelermen salystyrǵanda, jaram jeńil boldy. Qasymdaǵy Evgenıı esimdi jas jigit qyzýy kóterilip, kópke deıin dirildep jatty. Dárigerler qansha tyrysqanymen dene qyzýyn túsire almady. Medbıke naýqas kórshimniń qasynan tań atqansha ketpedi. Dári kómektespegen soń, Jenıanyń denesin álsin-álsin spırtpen súrtip otyrdy. Keıde qalǵyp ketip, kózimdi ashyp qalam da, medbıkeniń áli otyrǵanyn kórem. Shyntýaıtyna kelgende, onyń mindeti – dári salý ǵana ǵoı, al men kórgen medbıke dáriden qaıran bolmaǵan soń, óz ájesinen úırengen halyq emin qoldanyp, naýqastyń denesin tańǵa deıin spırtpen súrtip otyrdy. Oǵan qarap otyryp, eger dárigerdiń boıynda adamgershilik, janashyrlyq, jaýapkershilik syndy adamı qasıetter bolmasa, naýqasty eshbir emdeý hattamasy qutqaryp qala almaıtynyna kózim jetti», dedi dertinen aıyǵyp shyqqan naýqas.
G.Ýmanskıı naýqastardyń kóptiginen medbıkelerdiń táýligine 24 saǵat boıy tize búkpeı jantalasyp júretinin jetkizdi.
«Mundaı mamandarǵa tirisinde eskertkish qoısa, artyq bolmaıdy. Bári – jap-jas qyzdar. Biz túnge qaraı uıqyǵa ketemiz, al olar áli zyr júgirip júredi. Tańerteń oıansaq, sharshaǵan, biraq áli em-dom jasap júrgen medbıkelerdi kóremiz. Palatanyń tazalyǵyn saqtaý da sol kisilerdiń moınynda. Men 10 kún ishinde 10 keli salmaq joǵalttym. Koronovırýs degeniń – jaı nárse emes, naǵyz tajaldyń dál ózi. «Basy aýyrmaǵannyń baltyry syzdamaıdy» demekshi, aýyrmaǵan adam palatada bolyp jatqan sumdyqty bilmeıdi, bilmeı-aq ta qoısyn», deıdi G.Ýmanskıı.
Gerhard – Germanııanyń azamaty, alaıda Qazaqstanda turýǵa da zańdy ruqsat qaǵazy bar. Qazir Qostanaı qalasynda turady. Aıtýynsha, qostanaılyq dárigerler Eýropa dárigerlerinen esh kem túspeıdi. Adamgershilik ultqa qaramaıdy. Oǵan bizdiń dárigerlerdiń jankeshti eńbegi dálel bola alady.
Qostanaı oblysy
