Saz balshyq – órkenıet paıda bolǵaly adamzatpen birge jasap kele jatqan, myńdaǵan jyldyq tarıhy bar tabıǵı materıal. «Shamshyraq», «Tostaǵandar», «Ýaqyt bederleri» atty negizgi úsh taqyryptyq ınstallıasııadan quralǵan óner jármeńkesine 16 sheberdiń qoltańbasy qoıylǵan. Topyraqtyń tilin bilgen qyshshylar tabıǵattan, tarıhtan jáne jetistikter kózinen shabyt alady. Olar jasaǵan jumystar kúndelikti ómirde kezdesetin zattardyń rýhanı, kórkemdik jáne taktıldi áleýetin ashyp, sheber qolynyń jylýymen shuraılana túsken.
Ejelgi ýaqytta adamdar qumyrashylardyń sıqyrly kúshi bar dep sendi. Qyshtan jasalǵan týyndylardy qalyptaý prosesine adamnan basqa tórt element qatysady. Bular: jer, sý, aýa, ot. Jer – bul sazdyń ózi, sý – ony suıyltýǵa qyzmet etse, aýa – músindelgen pishinderdi keptiredi, al ot olardy kúıdirip, buıymǵa sońǵy beıne beredi. Eń bastysy bulardyń barlyǵy sheberge baǵynady.
Ekspozısııadaǵy Aısha Iýsýpova, Alına Drýzık, Anel Qulahmetova, Arına Van Engelen, Elena Mazýr, Irına Aroıan, Elza Kım, Irına Shlygına, Qalamqas Bekturǵanova, Karına Dmıtrıeva, Larısa Arıýtkına, Lılııa Góbeklioǵly, Natalıa Pokıdova, Nıke Skıdanova, Tatıana Grohotova, Iýlııa Lengard syndy qysh qupııasyn meńgergen sheberlerdiń qoltańbasy bir-birine múlde uqsamaıdy. Avtorlar ózi qalyptaǵan taqyrybyn ózderinshe sezinip, ózderinshe túısinedi.
– Kórme kolleksııalyq dızaın obektileri mártebesine zańdy túrde ótken qazirgi álemdegi qysh buıymdarynyń keskindi, úılesimdi «dybystalýyn» kórsetedi. Tehnologııanyń óristeýi jańa ekspressıvti quraldar – kúrdeli áshekeıler men angobalardy tabýǵa, kúıdirý sapasyn arttyrýǵa, elektrli kóze urshyǵyn jasaıtyn jańa beıneleý quraldaryn paıdalanýǵa múmkindik beredi. Degenmen búkil artyqshylyqtardy qoldansa da, saz balshyqpen jumys isteý ádisteri ózgerissiz qala beredi, al adam qoly – qysh jasaýdyń negizgi quraly. «Saz úndestigi» kórmesi – shyǵarmashylyqqa bet alǵan, qyshty súıetin jáne oqyp-úırenýge tabandylyq tanytatyndar úshin tamasha múmkindik, – deıdi kórme jetekshisi Vıoletta Vologodskaıa.
Elena jáne Vladımır Grıgorıandardyń sheberhanasy – kásibı qysh sýretshileri men músinshilerin plastıkalyq sheberlikke úıretetin Qazaqstandaǵy alǵashqy avtorlyq qysh galereıasy. Ol 2012 jyly otandyq sýretshilerdiń bastamasymen quryldy. Munda kásibı sheberlikke mashyqtanǵan óner ıeleri álemdik deńgeıdegi kórmelerge qatysyp, baıqaýlarda joǵary marapattarǵa ıe bolyp júr.
ALMATY
