Kezdesý barysynda Prezıdentke Eýrazııalyq damý bankiniń jumys nátıjeleri men Orta merzimdi josparlary, sondaı-aq aldaǵy kezeńge arnalǵan makroekonomıkalyq boljamdar týraly aqparat berildi.
Bank sarapshylarynyń baǵalaýy boıynsha Qazaqstanda EAEO elderi arasynda ekonomıkalyq ósýdiń eń joǵary serpini kútilýde.
Qasym-Jomart Toqaev Eýrazııalyq damý bankiniń 2022-2026 jyldarǵa arnalǵan strategııasynyń negizgi baǵyttarymen tanysty. Atap aıtqanda, Nıkolaı Podgýzov Prezıdentke Qazaqstannyń jáne EAEO-nyń basqa da memleketteriniń áleýmettik-ekonomıkalyq damýyna járdemdesýge baǵyttalǵan negizgi megajobalar týraly aıtyp berdi.
Bank «Soltústik-Ońtústik», «Eýropa-Batys Qytaı» kólik dálizderin qalyptastyrýǵa, biryńǵaı taýar ótkizý jelisin qurýǵa jáne Ortalyq Azııanyń sý-energetıkalyq keshenin jańǵyrtýǵa baǵyttalǵan jobalardy iske asyrýǵa járdemdesýge nıetti. Osy jobalarǵa EADB ınvestısııalarynyń jıyntyq kólemi 1,2 mlrd dollar deńgeıinde josparlanyp otyr. Jalpy bank 2026 jylǵa deıin Qazaqstan ekonomıkasyna keminde 3,8 mlrd dollar ınvestısııa salýǵa nıetti.
Memleket basshysy Eýrazııalyq damý bankiniń ıntegrasııalyq prosesterdi damytýdaǵy belsendi rólin atap ótip, Qazaqstan men búkil EAEO úshin belgilengen jobalardy iske asyrýdyń mańyzdylyǵyn nazarǵa aldy.
