«Avıasııalyq janar-jaǵarmaı tapshylyǵyna qatysty elorda áýejaıy Indýstrııa jáne ınfraqurylymdyq damý mınıstrligimen jáne Energetıka mınıstrligimen birlese otyryp, avıasııalyq otynmen qamtamasyz etý boıynsha jumys júrgizip jatqanyn málimdeımiz. Qazirgi ýaqytta sıpattalǵan synı jaǵdaıdyń aldyn alǵan», dedi Nursultan Nazarbaev halyqaralyq áýejaıynyń baspasóz hatshysy Ánýar Shalekenov.
Onyń aıtýynsha, áýejaıda turaqty jolaýshylar jáne júk reısterin úzdiksiz janarmaımen qamtamasyz etý jumystary júrgizilip jatyr, Pavlodar munaı-hımııa zaýyty jumysyn qalpyna keltirgenge deıin zaýyttardan avıasııalyq otyndy jetkizý kestesi ázirlendi.
«Qazirgi tańda elorda áýejaıynda qalǵan avıasııalyq kerosın naryqtyń basqa qatysýshylary, Air Astana áýe kompanııasynyń, áskerılerdiń, memlekettik rezervtiń saqtaýyn esepke alǵanda 3100 tonnany quraıdy. Jaqyn kúnderi 3900 tonna jetkiziledi dep kútilip otyr. Búginde 3800 tonna avıakerosın jetkizýge kelisim-shart jasalyp, tólendi», dep tolyqtyrdy baspasóz hatshysy.
