Ermek pen Erlan erteńgi kúnge úmitpen qaraıdy

Ol ózin «Ermek Ataqazıevpin» dep tanystyrdy. Áıeliniń esimi Marhamat eken. Qyzdary Aılın bir jarym jastan endi asypty. «Shirkin, – deısiń, – janary saý bolsa myna jigit el arqasyndaǵy júktiń bir shetin kóterisip-aq júretin azamat qoı. Boı deseń boı, túr deseń túri bar. Kúsh-qýattan da kende emes. Jasy da qylshyldaǵan qyryqta...». Biraq bul bizdiń ishki tolǵanysymyz. Onyń ózi mundaı kúıreýik sezimdi jaqtyra bermeıdi. – Otbasyńmen turyp jatyrsyń ba? Ata-anańa salmaq salmaısyń ba? – dep em: – Qalaı salmaq salasyń? Jas bolsa qyryqqa keldi. Qaıta olardy biz asyraýymyz kerek emes pe? – dep shart ete qaldy. Ermektiń áıeli Marhamat Taraz qalasyndaǵy temirjolshylar aýrýhanasynda syrqattarǵa massaj jasaıtyn bolyp shyqty. О́z kúnderin ózderi kóretin kásipkerlerdiń «tilimen» aıtsaq sol mekemeden bir bólmeni jalǵa alypty. Jalǵa beretin aqshasyn qospaǵanda bir aıda 45-50 myń teńge kóleminde tabys tabady. Al Ermektiń zeınetaqysy 29 myń teńgeniń o jaq, bu jaǵynda. Odan keıin Ermek te qol qýsyryp qarap otyrmaıtyn azamat kórindi. Soqyrlar qoǵamynda sport bólimi ashylyp, qazir soǵan jetekshilik jasap júrgen jaıy bar. Onyń jumysy, negizinen, zaǵıptardy sporttyq jattyǵýlar arqyly saýyqtyrýǵa, ıaǵnı ýaqyttaryn mándi ótkizýge atsalysý. Áńgimesin tyńdap otyrsam, ýaqyty sporttyq jarystardy uıymdastyrýdan, sportshylardy qadaǵalaýdan bosamaıtyn sııaqty. Sonda olar sporttyń qandaı túrimen shuǵyldanady? Aıtaıyq, shahmat, doıby, toǵyzqumalaq jáne júzý. Sonymen birge túrli deńgeıdegi jarystardy da uıymdastyrady. Aralarynda óz chempıondary da bar. Mysalǵa, qasyndaǵy Erlan Arǵynbaevty alaıyq. Dúnıege 1985 jyly kelgen onyń júgirýden «chempıon» degen ataǵy bar. Atap aıtsaq, osy óńirde ótken respýblıkalyq spartakıadanyń básekesinde 200 metr qashyqtyqty 32 sekóntte júgirip ótip, jeńimpaz atanypty. Aıaq-qol býyndary aýyratyn adam úshin bul ońaı meje emes. Osy qashyqtyqtaǵy álemdik rekordtyń kórsetkishi, mysaly, 28 sekónt eken. Al ol Erlannyń kórsetkishnen nebary 4 sekóntke ǵana az. Ermek aǵasyn tilshiler qosynyna jetelep kelgen de osy «jelaıaq» Erlannyń ózi. Sharshamaı kelip, qınalmaı tapqandaryna tánti boldym. Áıtpese, eki kózi birdeı zaǵıp Ermektiń ózdiginen júrýi qıyn. – Ereke, týa bitti zaǵıpsyz ba? – Joq, osydan 4 jyl buryn boldy. – Apattan ba? – Kóz aýrýynyń áseri. Asqyna berdi de, aıaǵy osylaı boldy. Bolashaqta sportqa jetekshilik etýmen qatar, basqa kásippen de shuǵyldansam ba dep oılaımyn. – Mysaly... – Jazý óneri qolymnan kele­tin sııaqty. Qazir tehnıka je­til­gen zaman, zaǵıptarǵa arnalǵan qu­rylǵylar da bar, eger kompıýterdiń klavıatýrasyna qolymdy jat­tyqtyryp alsam, monıtorǵa ne ja­zylǵanyn dybys arqyly estip oty­rýǵa bolady. Mysaly, áıgili kompozıtor Bethoven kereń bolǵan. Biraq qandaı ǵajaıyp mýzykalar jazyp ketti. Sol sııaqty zaǵıp talanttar da az emes qoı... Ermek pen Erlandy shyǵaryp salǵannan keıin, oılanyp qaldym. Ne degen rýhy myqty azamattar! Mynaý arpalysqa toly dúnıedegi qıyndyqtarǵa shydamaı on eki múshesi sap-saý qanshama jigitter araqqa salynyp ketti. Qanshasy ury atandy. Qanshasy qaraqshylyqpen kisi qanyn moıyndaryna júktep, temir tordyń arǵy jaǵynda otyr. Qanshasy... qaraptan-qarap qaıyrshyǵa aınalady. Sonyń bári erik-jigeri osaldar. Qıyndyqpen kúrese bilmeıtin jasyqtar. Al myna azamattardy qarashy, sap-saý adamnyń isteı almaıtyn tirlikterin istep júr. Osyndaı adamdardyń armanyn ushtap, keýdesindegi úmit otyn jaǵyp, aldaǵy araıly kúnderge umtyldyryp otyrǵan Qazaq eliniń adamgershilik parasaty da óte bıik bolǵany-aý. Táýbe! Kósemáli SÁTTIBAIULY, «Egemen Qazaqstan».  Jambyl oblysy.