Kezdesý barysynda Memleket basshysy elimizdegi janar-jaǵar maı qorynyń birden azaıyp ketýine jol bermeý qajet ekenin atap ótip, ishki naryqtaǵy jaǵdaıdy osyndaı keleńsizdikke ákep soqtyrǵan vedomstvolardyń jumysyn synǵa aldy. Prezıdent ónerkásip pen halyqty elektr energııasymen úzdiksiz qamtamasyz etý, sondaı-aq qosymsha óndiris qýaty kózderin qurý qajet ekenine nazar aýdardy.
Energetıka mınıstri Prezıdentke tapshylyqtyń ornyn toltyrý úshin qabyldanǵan shuǵyl sharalar týraly baıandady. Osyǵan baılanysty Atyraý munaı óńdeý zaýytyndaǵy jóndeý jumystary 2022 jylǵa shegerilgen. Budan bólek Reseıdiń Energetıka mınıstrligimen kelissózder júrgizilip jatyr. Sonyń nátıjesinde shamamen 150 myń tonna dızel otyny kórshi elden ımporttaldy. Maǵzum Myrzaǵalıevtiń aıtýynsha, qazirgi ýaqytta jaǵdaı turaqtalyp keledi.
Sonymen qatar mınıstr Memleket basshysyna Qazaqstannyń elektr energetıkasy salasyn damytýdyń 2035 jylǵa deıingi boljamdy teńgerimi jóninde aıtty. Aldaǵy onjyldyqta elektr energııasyn tutyný kórsetkishi jyl saıyn ósedi dep kútilýde. Osyǵan baılanysty jańartylatyn energııa kózderiniń, sondaı-aq gaz jáne gıdroelektr stansııalary esebinen óndiris kólemin ulǵaıtý josparlanyp otyr.
Memleket basshysyna sıfrlyq maınıng salasyn baqylaý úshin qabyldanyp jatqan sharalar tanystyryldy. Bul óz qyzmetin tirkeýsiz atqaratyn sýbektilerge qatysty. Mınıstr «sur» maınerler shamamen 1200 MVt-qa deıin elektr energııasyn tutynatynyn jáne olardy anyqtaý jumystary jalǵasyp jatqanyn atap ótti.
Qasym-Jomart Toqaev Úkimetke, qajet bolǵan jaǵdaıda, basqa da quzyrly organdardy tarta otyryp, atalǵan jumystardy jyldamdatýdy, sondaı-aq maınıngti zańnamalyq turǵydan retteý máselesin keıinge qaldyrmaýdy tapsyrdy. Bul rette «aq» maınerler óz qyzmetin qosymsha shekteýlersiz jalǵastyrady.
Memleket basshysy ishki naryqty sapaly janar-jaǵar maımen jáne úzdiksiz elektr energııasymen qamtamasyz etý úshin Qazaqstannyń resýrsy mol ekenin aıtty. Prezıdent Energetıka mınıstrine júktelgen mindetterdi sheshý úshin tıisti sharalardy qabyldaý qajettigin tapsyrdy.
