Kórme sóresine Qoljazbalar jáne sırek kitaptar ulttyq ortalyǵynyń qorynda jınaqtalǵan Qazaqstan tarıhyna qatysty sırek kitaptar, qazaq handarynyń hattary, Uly dala beınelengen ejelgi kartalar, sonymen qatar Qazaq handyǵy dáýirine tán tarıhı qoljazba qujattar qoıylǵan eken. Atap aıtsaq, ejelgi túrki-qypshaq dalasy beınelengen HVII ǵasyrda nıderlandtyq kartograf F.De Vıt syzǵan karta jáne HVI ǵasyrda aǵylshyn dıplomaty Entonıı Djenkınson jasaǵan Azııa kartasy qatarly qundy dúnıelermen birge, qazaq tarıhyna qatysty derektik maǵlumatqa baı qoljazba-kitaptar qoıylypty. Olardyń arasynda HIII ǵasyrda ómir súrgen tarıhshylar – Zaınaddın Vasıfı Haravıdyń «Badaı al-vakaı» týyndysy, Rýzbıhan ál-Isfahanıdyń «Mehmannama Buhara» kitaby, kúlli túrki jurtyna ortaq ǵulama Muhammed Haıdardyń «Tarıh Rashıdı», Kazı Ahmad Ǵafarıdyń «Tarıh Djahan ara» sekildi qundy eńbekteri kópshilikke usynyldy.
Osy oraıda mańyzdy jıyndy ashyp, kópshilikke atalǵan sharanyń maqsaty jaıly tanystyrǵan Mádenıet jáne sport mınıstrligi Arhıv isteri jáne qujattamany basqarý komıtetiniń tóraǵasy Qýat Borash: «Memleket basshysy Qasym Jomart Toqaevtyń «Táýelsizdik bárinen qymbat» atty maqalasynda: ««Mádenı mura» baǵdarlamasy ult shejiresin túgendeýge jol ashty. Otandyq tarıh ǵylymy tyń serpinmen damyp, túrli baǵyt boıynsha kóptegen zertteý júrgizildi. Buryn báımálim bolǵan qanshama tarıhı derekter, arheologııalyq qazynalar tabyldy. Tarıhymyz san myń jyldan tamyr tartatyny zattyq aıǵaqtarmen tolyqty. Elbasynyń osy irgeli bastamasy halqymyzdyń tarıhı sanasyn jańǵyrtýǵa zor úles qosty. Baǵdarlama aıasyndaǵy eńbekter tom-tom bolyp jaryqqa shyqty» degen bolatyn. Osy rette, memleket tarıhyn, ult tarıhyn zertteýde jáne onyń ǵylymı aınalymǵa túsýine jazba derektiń alatyn orny zor. Jazba derekter ár eldiń, ulttyń, jerdiń tarıhynan, mádenıeti men rýhanı ómirinen mol málimet beretin qundy mura, rýhanı baılyq», dedi.
Sózimizdi túıinder bolsaq, bolashaqta mundaǵy qoljazba derekter ǵylymı aınalymǵa túsýi qajet. Osy arqyly eldiń, ulttyń, jerdiń tarıhyn, mádenıeti men rýhanı ómirin jańa qyrynan tanyp, zertteýge tyń súrleý salynýǵa tıis.
Sýrette: Nıderlandtyq kartograf F.De Vıttiń kartasy. HVII ǵ.
