Bul memorıal 30-shy jyldary elimizdegi asharshylyqta jáne Sozaq kóterilisinde qurban bolǵan myńdaǵan sheıitke arnalyp, Táýelsizdigimizdiń 30 jyldyǵyna oraı ashylyp otyr.
«Sozaq qasireti» memorıaly Sozaq aýyl okrýgine kiretin kúre joldyń boıyndaǵy «Jastar» saıabaǵynda ornatyldy.
Demeýshiler kómegimen salynǵan memorıaldyń uzyndyǵy – 8 metr. Munda Sozaq qasireti jaıly tolyq maǵlumat beretin kók taqta qoıylǵan. «Sozaq qasireti» memorıalynyń aldyna kóterilis pen asharshylyq derekteri jazylǵan eskertkish ornatylǵan. Tarıhymyzdy túgendep, ótkenimizge baǵa berer is-sharaǵa elimizdiń túkpir-túkpirinen zııaly qaýym ókilderi, qoǵam qaıratkerleri, tarıhshy ǵalymdar men qalamgerler qatysty.
Ashylý saltanatynda Túrkistan oblysy ákiminiń orynbasary Sáken Qalqamanov sóz sóılep, tarıhymyzdaǵy mańyzdy oqıǵalar urpaq sanasynda qalatynyn, elimiz úshin Sozaqtyń orny erekshe ekenine toqtaldy. Mámbet Qoıgeldi, Talas Omarbekov, Berik Ábdiǵalıuly, Hangeldi Ábjanov jáne taǵy basqa el azamattary bul bastamaǵa joǵary baǵa berdi.
Igi isti uıymdastyryp, demeýshilik jasaǵandar qatarynda Orynbek Ibijanov, Beket Turǵaraev, Seksenbaı Turysbekov jáne taǵy basqa qadirli el azamattary bar.
