Shırek fınal joldamasyna talasqan alty boksshymyzdyń jeńisti joryǵyn 57 kılo salmaqtaǵy Serik Temirjanov bastap bergenin buǵan deıin jazǵanbyz. Ol úndi jigiti Rohıt Mordy oıqastap júrip erkin jeńgen edi. Serikten keıin sharshy alańǵa shyqqan ulttyq quramanyń kapıtany, 67 kılo salmaqtaǵy sańlaǵymyz Abylaıhan Júsipov te senimdi túrde jeńiske jetti. Ol polshalyq Damıan Dýrkachty jarys jolynan yǵystyrdy.
75 kılo salmaqtaǵy Nurqanat Raıys ta tamasha boks kórsetti. Aýǵanstan óreni Sýlıman Aslamımen qolǵap túıistirgen ol qarsylasyn ekinshi raýndta eseńgiretip te aldy. Qorytyndysynda qarsylasynan 5:0 esebimen basym tústi. 51 kılo salmaqta el úmitin arqalaǵan Sáken Bıbosynovtyń judyryqtasý stıli kóz súısintti. Úndi oǵlany Depaktyń eki aıaǵyn bir etikke tyqqan ol da shırek fınalǵa shyqty. 63,5 kılo salmaqta el namysyn qorǵap jatqan egizdiń syńary Sanatáli Tóltaev ýkraınalyq Denıs Pesoskııdi úıine qaıtardy. 80 kılo salmaq dárejesinde synǵa túsip jatqan Nurbek Oralbaı vengrııalyq Pal Kovachty jeńip, jankúıerlerdi jelpintti. Qysqasy, álem chempıonatynyń shırek fınalyna qalǵan alty boksshymyz da joldama aldy. Buǵan deıin tórt boksshymyz shırek fınalǵa shyqqan bolatyn. Olar endi bir kezdesýde jeńiske jetse, júldeger atanady.
