Medeý aýdanyndaǵy Shevchenko men Qonaev kósheleriniń qıylysynda ornatylǵan eskertkishtiń ashylý rásimine qalanyń ákimi Baqytjan Saǵyntaev qatysyp, ǵalymnyń qoǵam ómirindegi eren eńbegi jaıynda aıtyp ótti. «Elimizdiń tarıhynda óshpesteı iz qaldyrǵan memleket jáne qoǵam qaıratkeri Nurtas Ońdasynov kóptegen ıgi istiń bastaýynda turdy. El úshin qıyn zamanda ult múddesi jolynda batyl qadamdarǵa baryp, joǵary laýazymdy qyzmette júrse de táýelsizdiktiń ornaýy, tilimiz ben salt-dástúrimizdi qaıta jańǵyrtý isin bárinen de joǵary qoıa bildi. Ekinshi dúnıejúzilik soǵys jáne odan keıingi eń aýyr jyldarda el Úkimetin basqardy. Respýblıkamyzdyń áleýmettik-ekonomıkalyq damýyna, mádenıeti men óneriniń, ǵylymy men biliminiń órkendeýine barynsha kúsh saldy. Osy oraıda Nurtas Ońdasynovtyń ónegeli ómiri men halqyna jasaǵan qaltqysyz qyzmetin nasıhattaý, jas urpaqtyń sanasyna sińirý – abyroıly mindetimiz», dep atap ótti qala ákimi.
Nurtas Ońdasynov Qazaq memlekettik qyzdar pedagogıkalyq ınstıtýty men Ulttyq konservatorııanyń ashylýyna, shet tilderi, dene tárbıesi ınstıtýttarynyń jáne barlyq oblys ortalyqtarynda muǵalimder daıarlaıtyn joǵary oqý oryndarynyń qurylýyna uıytqy bolyp, órkendeýi jolynda aıanbaı eńbek etti. Elimizdegi Ertis – Qaraǵandy, Arys – Túrkistan, Myrzashól kanaldarynyń, Atyraý, Temirtaý, Jezqazǵan, Balqash, Aqtóbe qalalaryndaǵy iri zaýyttardyń, Moıynty – Shý temir jolynyń salynýyna tikeleı basshylyq ete júrip, óńirlerdiń damýy jolyndaǵy mańyzdy jobalardyń basy-qasynda júrdi. Búginde qaıratker tulǵanyń qoltańbasy qaı salada bolsyn aıshyqtalyp tur.
