«Senatqa jiberilgen kandıdatýra: Sáýle Omarova aqsha aınalymyn baqylaý basqarmasynyń basshysy qyzmetine bes jyldyq merzimge usynylady, orynbasary - Djozef Ottıng», delingen Aq úıdiń resmı saıtyndaǵy qujatta.
Jaqyn arada senattyń salalyq komıteti Sáýle Omarovanyń kandıdatýrasyn qaraý týraly tyńdaý ótkizetinin habarlaıdy. Odan keıin kongresmender daýys beredi. Al komıtettiń usynysy engizilgennen keıin senatta sońǵy daýys berý ótedi.
Sáýle Omarovanyń kandıdatýrasy maquldansa, AQSh-taǵy aqsha aınalymyn baqylaý basqarmasyna (Office of the Comptroller of the Currency, OCC) alǵash ret áıel jetekshilik etedi. Atalǵan qurylym 1863 jyly qurylǵan bolatyn.
Aıta keteıik, bıyl tamyz aıynyń basynda AQSh qarjy mınıstrligi valıýtalyq baqylaý basqarmasynyń basshysy qyzmetine Sáýle Omarovanyń kandıdatýrasy usynylǵany týraly aqparat taratqan. Oǵan deıin osy qyzmetke úmitker eki adam boldy. Alaıda Demokratııalyq partııanyń ishinde ózara tartys bastaldy. Aq úı eki kandıdatýradan da bas tartyp, professor Sáýle Omarovany qarastyrýǵa kiristi.
