«Halyq jaýynyń» qyzymyn
– Náýbetke toly asharshylyqtan keıin, Uly Otan soǵysynyń aldynda dúnıege keldińiz. Balalyq shaǵyńyz baldaı tátti bola qoımaǵan shyǵar…
– Men jaryq dúnıege kelgen 1938 jyldyń qıyndyqtary barshylyq. Ákemdi 1937 jyldyń qazan aıynda «halyq jaýy» degen syltaýmen qamaýǵa alyp ketken. Sondaǵy taqqan aıyptary «ákeń meshit ustaǵan, sen moldanyń balasysyń» degenge saıady. Qazaqshalap aıtqanda, ustap berý ǵoı. Negizi bireýler kórsetken. Ákem solaı Semeıdegi abaqtynyń ar jaǵyna kete barǵan.
Sol kezde jalǵyz aǵam bar. Ákemdi dúkennen ustap alǵanyn kórgen sol aǵam: «Áke» dep ún qatsa kerek. Sonda ákem: «Bar, bar, ana qaryndasyń men anańa ıe bol», depti. Qaryndasyń dep otyrǵany, ol kezde meniń ápkem bar bolatyn. Al ózim áli ómir esigin ashpaǵanmyn. Bul oqıǵa sol kezdegi Shar stansasynda bolǵan. Sodan ne kerek, aǵataıymdy «halyq jaýynyń balasy» dep mektepten shyǵaryp jiberedi. Ol keıin: «Oı, ol kezde meniń kórgen qorlyǵymdy eshkimniń basyna bermesin. Tún ishinde depodan baryp, kómir urlap keletinmin», deıtin. Aǵataıym áıteýir ákemniń joqtyǵyn bildirmeı, bir jyl boıy anam men qaryndasyna qamqor bolǵan. Ákem ketken soń araǵa segiz aı salyp men dúnıege kelippin. Kishkentaı shaqalaqtyń dúnıe esigin ashqanyn eshkim eleń qylmapty. Atymdy da qoımaǵan. Qansha degenmen «halyq jaýynyń» qyzymyn ǵoı. Eshkim úıge kelmeıdi. Men týǵannan keıin arada jıyrma kún ótken soń ákem túrmeden shyǵypty. Bul degenimiz bir tylsym sııaqty. Ony ákem bylaı áńgimeleıdi:
«Túrmede jatqanbyz. Qymtyrylyp-qystyrylyp otyramyz. Birde qysylysyp jatyp uıyqtap ketippin. Túsimde bir aqsaqaldy kórdim. Bólmege kire bergeninde «Assalaýmaǵaleıkúm» dep amandassam, ol kisi barmaǵyn ǵana berdi. «Saǵan osy da jetedi» dep aıtty», deıdi ákem. Arada úsh kún ótkende ákem túrmeden shyǵady. Ol kisiniń úlken-úlken kitaptary bar-tyn. Sol kitaptaryn aqtaryp otyryp, meniń atymdy Nursıfat dep qoıypty. Ákemniń adam emdeıtin qasıeti de bar bolatyn. Aıtyp-aıtpaı ne kerek, men úıdiń erke qyzyna aınaldym. Sóıtip ákem: «Qoı, myna arada kún kóre almaspyz. Sıyrymyz, at-arbamyz bar. Bir retin taýyp kúneltermiz» dep Shardan alpys shaqyrym jerdegi Jańaaýyl degen kolhozǵa kóship ketedi.
– Ol aýylda «halyq jaýyna» jumys berdi me?
– «Halyq jaýy» dep ol jaqta da salqyn qarsy alyp, áreń degende buzaý baqtyryp qoıypty. Buqashoqy degen qyratta otyryp buzaý baǵady. Úıge kelgende bıdaı qýyryp, shaı ishemiz. Sóıtip júrgende bir kúni aýatkom degender minetin at-arba aýlamyzǵa kelip, bir qap un, bir qap tary, bir qap bıdaı tastap ketti. Biz túsinbeı dalmyz. Sóıtsek, bul ákemniń emshilik qasıetiniń arqasynda kelgen dúnıe eken. Bizdiń otbasy Jańaaýylǵa kóship kele jatqan kezimizde jolda aıaldap, bulaqtan sý alyp shaı iship otyrǵan ǵoı. Sol kezde bir at-arba toqtapty. Arba ústinde bala baılaýly jatyr eken. Sonda álgi at-arbadan túsken egde kisi: «Raha, myna balany oqyp berińizshi», dep ótinipti. Ákem bolsa: «Oıbaı, atama. Kózim ashylyp, túrmeden endi shyǵyp otyrmyn, keregi joq», dep basyn ala qashqan. Sonda álgi kisi eshkimge aıtpaıtynyn jetkizip, ant-sý iship ákemdi kóndiripti. Ákem álgi balanyń qol-aıaǵyn sheshkizgen. Sonda bala ákeme tura júgiripti. Osy sátte ákem dem salyp, jaqtan bir tartyp jiberipti. «Endi ózenge aparyp jýyndyryńdar. Boldy, jazylady», depti. Álgi bala aýatkomnyń týysynyń uly bolyp shyqty ǵoı. Myna olja sol jaqsylyqtyń qaıtarymy eken. Eshkimge bildirmeı, qydyryp júrgendeı ákep tastapty.
Ákem aqyndar aıtysyna qatysady. «Halyq aqyny» ataǵyn alady. Sonda ákem: «Bizdiń myna qyzymyz baqytty qyz boldy, ákesin túrmeden shyǵaryp aldy. Osy qyzym týǵan soń «Halyq aqyny» ataǵyn aldym», dep rıza bolatyn. Men qyz baladan góri, er bala sekildi óstim. Uldarǵa tán kekil qoıatyn bolyppyn. Mektepke barǵanda ol sál ósse, qaıyryp tastap, balalarmen «óı, ákeń» dep qoıyp tóbelesip oınap ketedi ekenmin.
– Qansha degenmen soǵys jáne soǵystan keıingi kezeń ǵoı. Erke bolǵanyńyzben eńbekke bala kúnnen aralastyńyz…
– Durys aıtasyń. Qansha degenmen soǵys júrip jatqan kezeńniń balasymyz. Úshinshi-tórtinshi synypty bitirgen kezde-aq bizdi dereý áketip, jumysqa jegetin. Shómele jınaımyz. Egistik dalasyna baryp, aram shóp julamyz. Qolymyzǵa tikenek kirip jylap ta alatynbyz. Solaı jylap otyrǵan kezde qolynda qolǵaby bar bir orys apaı meniń aldymdy tazalap, eldiń qataryna qosyp jiberdi. Eseıe kele úıde er balanyń qyzmetin atqardym. At arbany jegip nemese atty erttep alyp, ózim minip kete beremin. Bizdiń taǵdyrymyzdyń keıbir tustary Abaı Qunanbaevtyń ómirimen sáıkes keledi. Osy Shar degen jerge Abaı úsh márte at basyn burǵan eken. Bolys sekildi ulyqtardy saılaý ótetin. Shar degen at sodan qalǵan bolar dep paıymdaımyn. Ol dáýirde daýys bergende qazirgi bıýlleten ornyna shar salatyn bolǵan.
Soǵys bitken 1945 jyly Abaı Qunanbaevtyń 100 jyldyq toıy ótkizildi. Ákem sol toıda aıtysqa qatysyp, bas júlde ıelendi. Osylaısha, Rahymbaı Dúısekeevtiń aty dúrkiredi. Ákem jaryqtyq «halyq jaýy» atanǵan soń ábden qaımyǵyp qalsa kerek. Jaı sóıleıtin. Úıdegi terezelerdi sańylaý qaldyrmaı bekitip, jaýyp tastaıtyn. Osylaısha, biz eńbek dalasynda júrip eseıdik. Tek onynshy synypty aıaqtaǵan kezde ǵana jumysqa aparǵan joq. О́ıtkeni oqýǵa tapsyrýymyz, qujat ótkizýimiz kerek qoı.
«Dáriger bolamyn dep ábigerge tústim»
– Medısınalyq ınstıtýtqa qujat tapsyryp túse almaı qaldyńyz. Sonda armanyńyz dáriger bolý ma edi, álde tula boıyna emshilik qasıet daryǵan ákeńiz osylaı uıǵardy ma?
– Ákem qatty aýyrdy. Ol kisini sovhozdan aýdan ortalyǵyna alyp keldi. Dıagnozy qazir aıtyp júrgen júrek talmasy eken. Bir qol, bir aıaqtan qaldy. Alaıda anyq sóıleıtin. Turyp-júrýi qıynǵa soqty. Qarashada qulaǵan ákem aqpan aıynda baqılyq boldy. Ol tirisinde: «Osy qyzym mektepti bitire salysymen doqtyrdyń oqýyna túsiremin», deıtin. Ákem dúnıeden ozǵan soń aǵataıym Semeıge alyp bardy. Mektep kezinde «Algebra, hımııa, qonbaıdy meniń mıyma» dep júretinmin. Sóıtsem, bul medısına salasyna túsý úshin bıologııa men hımııany jaqsy bilý kerek eken. Sol kezdiń bir kemshiligi, mektepte hımııadan beretin muǵalim joq. Algebradan sabaq beretin ustaz da jetinshi synypta keldi. Durystap oqymaǵan soń qıynǵa soǵady eken. Emtıhandy tapsyrýyn tapsyrǵanymmen úsh degen baǵa alyp, oqýǵa túse almaı qaldym.
– Áke armany oryndalmaı, mektepte muǵalim bolyp eńbek ete bastadyńyz ǵoı...
– Iá. Sodan aýdanǵa qaıtyp kelgen bette bilim bóliminiń basshysyna kirip, jumys suradym. «Nege oqýǵa túse almaı qaldyń?», dep surady. Hımııadan óte almaǵanymdy túsindirdim. Shardan jetpis bes shaqyrym qashyqta ornalasqan Qyzyljetek degen eldi meken bar bolatyn. «Sol jaqtyń mektebine baryp sabaq beresiń», dedi ol kisi. Men jaǵrapııa men tarıhty jaqsy biletinimdi jetkizdim.
Baıaǵy erkeligime basyp: «Oıbaı, aǵa, jetpis bes shaqyrym jerge bara almaımyn, alys qoı», dep qıǵylyq saldym. Ol kezdiń ustazdary da, adamdary da meıirimdi ǵoı. Molotov kolhozyn surap edim, birden kelisti. Kolhozdyń ortalyǵy Qarash degen aýylǵa jiberdi. Sol jerde júrip, besinshi, altynshy, jetinshi synyp oqýshylaryna tarıh jáne jaǵrapııa pánderinen bir jyl sabaq berdim. Bir qyzyǵy, keıbir oqýshylar ózimnen úlken. Bir cheshenniń balasy oqydy. О́zi taýdaı. Sabaq oqymaıdy. «Áı, sen nege sabaq bilmeısiń?» dep qolymdaǵy «ýkazkamen» tartyp jiberetinmin. Biraq ózim balalar tosynnan qıyn suraq qoıyp qalmasyn dep kitaphanaǵa baryp, tarıhqa, jaǵrapııaǵa qatysty kitaptardyń barlyǵyn aqtaryp, daıyndalatynmyn. Jezdem maǵan sabaq kestesin, jospardy qalaı jazý kerektigin kórsetip beretin. Jezdemniń aýylyna suranyp kelgenim jaqsy bolǵan eken dep qýanatynmyn. Qarap júrmeı kórkemónerpazdar úıirmesin de quryp aldyq. Túrli kórinis sahnalap, is-sharalar ótkizip, merekelerde konsertter qoıyp júrdik. Keıin tipti aýyl sharýashylyǵy salasyna da qujat tapsyryp kórdim. Nem bar deseńshi?! Meniń ómir boıǵy armanym – teatr ınstıtýtyn bitirý. Keıin Jambylǵa kelip, mádenı-aǵartý ýchılıshesinen bilim aldym ǵoı. Sadyhan Áýbákirov, Iаhııa Shinásilovtiń dárisin tyńdadyq.
– Siz uzaq jyldar boıy teatrda eńbek ettińiz. Áıtkenmen «Qunanbaı» fılmindegi Zere ájeniń róli baǵyńyzdy ashyp, Memlekettik syılyqtyń laýreaty atandyńyz. Búkil eńbegińizben emes, bir ǵana rólińizben osyndaı marapatqa ıe bolýyńyz ózińizge kezdeısoq baq sekildi kórinbeı me?
– Joq, olaı dep aıtpas edim. Kıno men teatrdyń aıyrmashylyqtary bar. Mysaly, bir spektaklde jibergen kemshiligińdi sezesiń, biraq ony mezetinde túzeı almaısyń ǵoı. Kınoda olaı emes. Bul – men birinshi ret túsken kıno. Buryn Turar Dúısebaev azdap kıno túsirgende jaı ǵana kópshilik sahnasyna qatysyp qaıtatynbyz.
«Qunanbaı» fılmine kádimgi kastıng, ıaǵnı irikteý arqyly qatystym. Shaqyrdy, bardym. Keterimde Doshan Joljaqsynov: «Apa, siz jalǵyz emessiz. Áli talaı apalardy shaqyramyz. Kimniń beınesi keledi, sony alyp qalamyz», dep tuspaldady. Onysy endi «ótpeı qalsańyz, renjimeńiz» degeni ǵoı. «Jaraıdy, qaraǵym» dep kete bardym. Sodan ne kerek, sáýir ótti, mamyr aıaqtaldy, maýsymnyń da jartysy artta qaldy. Sosyn men: «Oı, Jambyldyń drama teatryndaǵy kempirdi ne qylsyn? Almatyda Halyq ártisteri kóp qoı. Men jaı ǵana Mádenıet qaıratkerimin», dep oılap, bul máseleni jyly jaýyp qoıa salǵanmyn. Bir kúni maýsym bel ortasyna taıaǵanda ekinshi rejısser qońyraý soǵyp tur. Amandyq-saýlyqtan soń: «Apa, on ekisi kúni Semeıde bolyńyz. Túsirilim bastalady. Kórkemdik keńestiń sheshimimen siz laıyq dep tanyldyńyz», dedi. Kastıng ótip jatqanda Doshan: «Apa, eger ótip jatsańyz, atqa minesiz», degen edi. Sol kezde men: «At men úshin tańsyq emes, qaraǵym. Aýyldyń adamymyn. Biraq atqa sońǵy ret 1965 jyly mingenmin. Sodan keıin atqa otyryp kórmeppin», dep mán-jaıdy jaıyp saldym. Doshan qorqynyshymdy basyp, toqsan beske kelgen adamdy da atqa mingizgenderin aıtty.
– Ol kezde, qatelespesem jetpis alty jastasyz…
– Iá, sol jyly jetpis alty jasta bolatynmyn. Kelistim. Atqa minesiń degen soń ishteı daıyndalyp júrdim. Eger óte qalsam, «Apa, myna atqa minesiń» dep kórsetedi ǵoı degen oı qushaǵynda boldym. Qaltama qant salyp júreıin dep sheshtim. Sóıtsem, alǵashqy kúni-aq túsirilim Qunanbaıdy Ombyǵa áketetin sıýjetpen atqa minýden bastaldy ǵoı. Qatty qoryqqanymdy jasyra almaımyn. Sodan atqa miner aldynda «O, Qambar atam meniń, arýaǵyńmen demeı, jebeı kór» dep jylqy malynyń pirinen ózimshe kómek suradym.
Abaı aýdanynan on eki shaqyrym jerdegi Qarashoqy degen jerge tańǵy toǵyzda bardyq. Túsirilim kúni boıy jalǵasty. Kóp bolsa 4-5 dýbl jasaldy. Men kınoǵa buryn túspegenmin, kóp jaıtty bilmeımin. Kımeshektiń astyńǵy jaǵyna mıkrofon qoıyp qoıǵan eken. Ony oılap jatqan joqpyn. Qunanbaıdy áketip bara jatqan jerinde «Qunaaash, Qunaaash» dep aıqaıǵa bastym ǵoı. Sóıtsem qasymdaǵylar: «Apa, moınyńyzda mıkrofon bar. Ondaı aıqaıdyń keregi joq» dep kúledi. Osy kezde kádimgideı qınalyp qaldym. Áıteýir bári sátimen jalǵasty. Bári bitken soń attyń ústinde turǵanmyn. Bir kezde Doshan kelip: «Apa, rahmet! Kóp rahmet!» dedi. Doshan da, men de ókisigimizdi basa almaı jylap turmyz. Attan túskenim sol edi, sol jerde júrgender: «Apamyzǵa sýyq tıip qalmasyn» dep báıek bolyp jatyr. Men bolsam: «Meni qymtamańdarshy, jiberińdershi, ana taýdyń arasyna baryp, aıqaılap jylap-jylap keleıin», dep jatyrmyn. Sol rólge ábden berilgenimnen shyǵar laýreat atanǵanym dep paıymdaımyn.
– «Qunanbaı» fılminiń túsirilimi kezinde qandaı qıyndyqtar boldy?
– Alpys jylǵa jýyq teatrda eńbek etken tájirıbem bárine jetedi. Tek, bólek bir kúı keshtim. Qıynǵa soqqan kadr bolmady emes, boldy. Ol – namazymdy oqyp otyryp, oıymdy bóletin shaǵym bar ǵoı, bárinen de sol aýyr tıdi. Namaz ústinde selk etip «E-e-e, omyraýymdy jýmaı, dáret almaı emizbeýshi edim, qulynym. Orystyń túrmesinde asyl súıegiń shirıtin boldy-aý!» dep tebirenemin. Negizi namaz ústinde oı múlde bólinbeýi kerek. Túsirilimnen soń namazymdy jalǵastyryp, aıaqtadym.
«Qaraýyl bolyp jumys istedim»
– Sizdiń ómirińizdiń ózi drama sııaqty. Qyryq jasqa jetpeı otaǵasy Maqsuttan aıyryldyńyz, ol azdaı ulyńyz baqılyq boldy. Taǵdyrdyń túrli taýqymetin bir kisideı tarttyńyz. Biraq mort synǵan joqsyz…
– Bárine járdemshi bir Alla ǵoı. Ulym qaıtys bolǵan kezde qatty aýyrdym. Toqtaı almaı jylap-syqtadym. Qaıtyp kelmeıtinine kózim jetti. Sol kezde qasymdaǵylar: «Áı, Nursıfat, jylaı berme. «Jylaǵanǵa jas beremin» degen bar. Qudaı bereke bersin. Ne isteısiń Allanyń jazǵanyna», dep jubatty. Osy kúnde elder: «Kryshań bar ma?» dep jatady ǵoı. Men eshqandaı «kryshasyz» taza ózimniń eńbegimmen kele jatqan adammyn. 1959 jyldyń on úshinshi sáýirinde meni teatrǵa jumysqa qabyldady. 42 som 50 tıyn aılyq alatynmyn. Sosyn osy jyldyń kúzinde oqýǵa túseıin desem, dırektorym Tólebaev degen kisi: «Sen oqýǵa túsetin bolsań, jumys isteı almaısyń. Jazdaı issaparda júrgenińdi eskerip, shtatqa alaıyn dep otyrǵanbyz. Onda biz seni shtatqa qabyldamaımyz», dep kesip aıtty.
Ol jyldary biz burynǵy kók bazar mańyndaǵy eki qabatty úıde shaǵyn ǵana bir bólmede turyp jatqanbyz. Negizi bir bólmeli páterlerde as úı bolady ǵoı. Al ol jerde túk joq. Jaı ǵana bir bólme bar. Joldasymyz ekeýmiz aqyldasyp, oqý máselesin keıinge shegerdik. Maqsatym eki jasta bolatyn. Issaparlarǵa ketken kezde ony aýylǵa atasy men apasyna aparyp tastaıtynbyz. Aıtyp-aıtpaı ne kerek, jumys isteıik dep sheshtik. Sodan teatrǵa qabyldanǵan bette men eń alǵash Sholpannyń, «Bóltirik bórik astynda» qoıylymyndaǵy Marfýǵanyń rólderin somdadym. Sóıte-sóıte kóptegen ról buıyrdy.
Teatrdyń irgetasyn qalaǵan Halyq ártisi Sháripbaı Sákıev, Halyq ártisi Altyn Rýjeva, eńbek sińirgen ártister Muqametqalı Tabanov, Gúljamal Batyrǵalıeva bastaǵan myqty ártistermen birge eńbek ettim. Osy kisiler meniń qatelesken jerlerimdi túzedi. «Bul jerde bylaı isteısiń, myna jerde bylaı etesiń» dep baǵyt-baǵdar berip otyrdy. Sháripbaı Sákıev «sahnada bir aıaǵyń, deneń bos turmaýy kerek» dep sahnanyń ómirin úıretti.
– Maqsut aǵamyz dúnıeden ozǵan kezde basqa da jumystar istegenińizdi bilemiz…
– Oı, ol kezde ne istemedik? Men turǵan úıdiń astynda oblystyq saýda basqarmasy boldy. Sol jerde jumys isteıtin bir kelinshek úıge kelip shaı iship júretin. Bir kúni qońyraý shalyp: «Apaı, ty býdesh ý nas rabotat?» dep tur. О́zi orys tildi edi. Qandaı jumys ekenin surap edim: «Tehnıchka» dep jaýap berdi. Túnde meni kim kórip jatyr? Kelistim. Úıdiń astyna túse salyp, jınap qoıamyn. Bir-eki saǵatym ketedi. Ol maǵan qıyn bolyp pa? Keıin sol jerdiń bastyǵy bolǵan Jandarbekova qyzmet aýystyrdy. Ornyna kelgen orys kisi qysqartý jumystaryn júrgizdi. Jańa basshy maǵan: «Apa, siz túngi qaraýyl bolýǵa kelisesiz be?» dep surady. Kelisim berdim. Osylaısha, túnde mekemeni tazalaımyn ári qaraýyl bolyp eńbek etemin. Odan bólek teatrda býtafor sekildi kóptegen jumystardy qosymsha atqardym. Keıde tik júrýimniń sebebi tynymsyz eńbektiń, qozǵalystyń arqasy dep bilemin. Bári Allanyń raqymynyń arqasy ǵoı. Túbinde bári jaqsy bolady dep júrgende balamnan aıyryldym. Otaǵasy uzaq aýyrdy. Baǵyp-qaqtym. Teri aýrýy aqyry alyp tyndy.
Soǵysqa alyp ketemiz dep aýdandyq áskerı bólim ertip áketken kezde sol jerde jumys isteıtin naǵashysy alyp qalǵan. Sóıtip, Shyǵys Qazaqstandaǵy Kanaıka degen jerdegi volfram shyǵaratyn shahtaǵa aparyp, jumys istetken. Bir jyl sonda eńbek etken. Onyń da áseri bolǵan shyǵar. Áıtkenmen, bizdiń doqtyrlardan da aǵattyq ketti-aý. Arqasyna barmaqtaı qara súıel shyqqan edi. Qazaq súıelge tımeıdi ǵoı. Emhanadaǵylar ony kesip alyp tastapty. Túbinde sol súıel otaǵasyn alyp ketti dep oılaımyn. Kim bilsin. Bala oqý bitirmedi, úılenbedi. Bylaıynsha aıtqanda, jer ortasynda qaldym ǵoı.
«Tabanovtyń úıin on bes kún panaladyq»
– Maqsut aǵany Turar Dúısebaev jaǵdaıyn jasaımyn dep jumysqa shaqyrdy. Keldińizder. Biraq ol kisi jumystan ketip qalǵan. Osy habardy estigende qandaı kúı keshtińizder?
– O-o-o, ol kezde qansha degenmen halyqtyń peıiliniń keńdigin kórdik qoı. Muqametqalı Tabanov aqsaqal bizdi úıinde on bes kún turǵyzdy. Aýyldan qamsyz kelgenbiz. Bolmasa qaıtyp ketermiz dep oılaǵanbyz. Biraq kelgen soń otaǵasyna Bekejandy, Er Tarǵyndy oınatty. Sóıtip, teatrǵa aldy. Endi artqa jol joq. «Qaıtyp kelgen qyz jaman, qaıta shapqan jaý jaman» degen sózge qalmaıyq dedik. Ne bolsa da kóreıik dep teatrda qaldyq. Qudaıǵa shúkir, Áýlıeata jeri topyraǵy qasıetti ólke ǵoı. Taıaq ustap kelgenge taı mingizetin óńir ekenine kóz jetti. Úıdegi kisi qaıtqan soń aǵataıym kelip, elge qaıtýymdy ótindi. Biraq men qara shańyraqtyń tútinin óshirmeıtinimdi, kıeli Áýlıeatanyń tek jaqsylyǵyn kórgenimdi aıtyp, osy jerde júrip jetiletinimdi jetkizdim.
– Kez kelgen akter nemese aktrısa ómir boıy bir rólderdi oınamaı kettim dep jatady ǵoı. Siz de kezinde myna rólderdi somdaýym kerek edi dep oılaıtyn bolarsyz?
– Men Baıan, Eńlikti oınadym. Shirkin-aı, «Aı tutylǵan túndegi» Tańqabıkeni somdasam dep armandadym. Biraq bolmady. О́ıtkeni qoıylmady ol kezde. Qoıylym qoıylǵan kezde men Shafaq rólin somdadym. Jasym soǵan sáıkes bolǵan-dy.
– «Qunanbaı» fılmi arqyly Memlekettik syılyqty Táýelsizdiktiń 25 jyldyǵy qarsańynda aldyńyz, egemen el bolǵanymyzǵa otyz jyl toldy…
– Iá, shúkir. Táýelsizdiktiń arqasynda osyndaı fılmder túsirilip jatyr. Bári Elbasynyń, Prezıdenttiń sarabdal saıasatynyń jemisi ǵoı. Sondyqtan Allaǵa táýbe deımin.
– Áńgimeńizge rahmet.
Áńgimelesken
Tabıǵat MUSYLMANQUL,
«Egemen Qazaqstan»
