Fınalda Beknur Jánibekuly jáne Álınur Hamzın birdeı 30,5 paıyz daýys jınady. Endi talantty oryndaýshylar 19 jeltoqsan kúni Parıjde ótetin halyqaralyq baıqaýda «Ertegi álemi» ánimen Qazaqstannyń atynan óner kórsetedi. Bul týraly QazAqparat «Habar» Agenttigine silteme jasap habarlaıdy.
Ulttyq irikteý jeńimpazdary qazylar alqasynyń baǵalaýy jáne telekórermenderdiń SMS-daýys berý nátıjeleri boıynsha anyqtaldy.
Ulttyq irikteý konsertiniń tikeleı kórsetilimi búgin «Habar» telearnasynyń efırinde ótti. 10 fınalıst tanymal qazaqstandyq kompozıtorlardyń arnaıy jazylǵan avtorlyq ánderimen óner kórsetti.
Parıjde ótetin 19-shy Junior Eurovision Song Contest balalar án baıqaýyna 19 el qatysady. Olar: Albanııa, Armenııa, Ázerbaıjan, Bolgarııa, Fransııa, Grýzııa, Germanııa, Irlandııa, Italııa, Qazaqstan, Malta, Nıderlandy, Soltústik Makedonııa, Polsha, Portýgalııa, Reseı, Serbııa, Ispanııa jáne Ýkraına.
Alǵash ret Qazaqstan Junior Eurovision baıqaýyna 2018 jyly qatysty. Baıqaýǵa Danelııa Tóleshova «О́zińe sen» ánimen qatysyp, altynshy orynǵa ıe boldy. 2019 jyly Erjan Maksım «Armanyńnan qalma» ánimen ekinshi oryn aldy (qazylar alqasynyń sheshimi boıynsha birinshi oryn).
2020 jyly pandemııaǵa baılanysty balalar Evrovıdenıesi onlaın-formatta ótti. Baıqaýǵa ánder jazba nusqasynda usynyldy. Qazaqstan namysyn qorǵaǵan Qaraqat Bashanova «Forever» ánin oryndap, qazylar alqasy men kórermenderdiń daýys berý qorytyndysy boıynsha 13 qatysýshynyń arasynda ekinshi orynǵa ıe boldy.
