BAQ ókilderiniń suraǵyna jaýap bergen mınıstr ázirge tótenshe oqıǵaǵa naqty kimniń kináli ekenin aıtý erte ekenin jetkizdi.
«Kez kelgen tergeý sharasynyń talaby bolady. Ázirge naqty anyqtalǵan kináliler joq. Biraq kúdiktilerdiń, jaýap alynatyndardyń belgili bir toby bar deýge bolady. Mundaı faktige jol bergeni úshin qylmystyq jaýapkershilik qarastyrylǵan. Biraq onyń bári komıssııa júrgizgen jumystardyń qorytyndysy boıynsha aıqyndalady», dedi vedomstvo basshysy.
Sondaı-aq, ol oqıǵa kezinde qaza bolǵan kenshilerdiń úı ishine qandaı kómek kórsetiletinin de aıtty.
«Jumysshy men jumys berýshi arasynda bekitilgen eńbek sharty boıynsha, qaza bolǵandardyń báriniń otbasyna 10 jyldyq aqshalaı tirshilik shyǵyny tólenedi. Budan keıin jeke kelisimsharttar aıasynda nesıelerin jabý máselesi qarastyrylady. Qazir stýdent bolyp júrgen balalary bolsa, olardyń oqýyn tóleý máselesi mindetti túrde eskeriledi. Qolda bar jeke eńbek sharttarynyń aıasynda kompanııa muqtaj otbasylarǵa baspana berý máselesin de pysyqtaıdy», dedi mınıstr.
Eske salaıyq, 7 qarasha kúni saǵat 08:24-te «ArselorMıttal Temirtaý» AQ Kómir departamentiniń «Abaı» shahtasynda metan gazy taraı bastaǵan. Bul ýaqytta shahtada 64 adam jumys istep jatqan, 54-i evakýasııalandy.
Apat saldarynan eki adam zardap shegip, alty kenshi qaza tapty. Zardap shekkender aýyr halde jansaqtaý bóliminde jatyr.
