Sessııanyń fasılıtatory, Fılosofııa, saıasattaný jáne dintaný ınstıtýtynyń ǵylymı qyzmetkeri Nurken Aıtymbetov sóz basynda jastardyń saıasattaǵy róline toqtalyp, belsendi jastardyń úles salmaǵy Almatyda basqalarmen salystyrǵanda áldeqaıda joǵary ekenin sóz etti.
Alǵashqy bolyp sóz tizgini tıgen Saıası zertteýler ortalyǵynyń dırektory, fılosofııa ǵylymdarynyń kandıdaty Aıdar Ámirebaev saıası mádenıettiń ulttyq negizderi bar ekenin qaperden shyǵarmaýǵa shaqyrdy. «Saıası mádenıettiń irgesi ulttyq tárbıe arqyly qalyptasady. Ony elemeı saıası mádenıetti damytamyz deý bos áýreshilik bolady» deıdi ol.
Zertteýshi, ǵalym Almasbek Shaǵyrbaevtyń oıynsha, qazirgi tańda jastardyń saıası kózqarasyna áleýmettik jeli qatty áser etip jatqan joq. Ol jaqta ártúrli toptardyń múddesi taıtalasyp jatqandyqtan, jastar olarǵa erip, qate saıası ustanymǵa urynyp jatady. Sol sebepti jastar óz saıası mádenıetin áleýmettik jelidegi jaýapkershilikten bastaý kerek ekenin atap ótti.
Azamattyq belsendi, byltyr elimizde ótken Parlament saılaýynda baqylaýshy bolǵan Asyltaı Tasbolat jastardyń saıası mádenıeti erkindiktiń arqasynda qalyptasady dep esepteıdi. «Bala óse kele ata-anasynan táýelsiz bolyp, jeke-dara ustanym ıesi atanatynyn eskersek, jastar da eseıe kele memlekettiń saıasatynan bólek óz betinshe saıası mádenıet qalyptastyrady. Olarǵa memleket óz saıasatyn tańbaı, erkin qalyptasýyna jaǵdaı jasaýy kerek. Saıası mádenıet májbúrlikpen qalyptaspaıdy, erkin tańdaý ıdeıalary arqyly qalyptasady» dep pikirin bildirdi A.Tasbolat.
Fılosofııa, saıasattaný jáne dintaný ınstıtýtynyń taǵy bir ǵalymy Damır Fazyljannyń sózine qulaq túrsek, sıfrlandyrý úrdisteriniń jastarǵa yqpaly orasan. «Jastardyń jańa qurylǵylar men sıfrly baǵdarlamalardy ońaı meńgerýi kóńil qýantatyn jaǵdaı, biraq olar sonymen qatar tutynýshy. Qandaı aqparat alady, sony tutynady. Neni tutynady, sonyń yqpalyna túsedi» deıdi ol.
Sessııa sońynda fasılıtasııalyq taqta negizinde arnaıy usynystar men sheshý joldary ázirlenip, ol quzyrly mekemelerge joldanatyn bolyp kelisildi.
ALMATY
