«Úkimettiń zań jobalaý jumystarynyń 2022 jylǵa arnalǵan josparynyń jobasynda 31 zań jobasyn ázirleý kózdelgen. Onyń ishinde birinshi jartyjyldyqta Parlamentke 11 zań jobasyn, al ekinshi jartyjyldyqta 20 zań jobasyn engizý qajet», dedi Beketaev.
Onyń aıtýynsha, jospar jobasy Prezıdent belgilegen mindetter men memlekettiń strategııalyq qujattary negizinde jasalǵan.
Mınıstr Qazaqstan Respýblıkasynyń áleýmettik kodeksin, «Kásibı biliktilik týraly» jáne «Aglomerasııalardy damytý týraly» zań jobalaryn ázirleý Memleket basshysynyń Joldaýyn iske asyrý jónindegi Jalpyulttyq is-sharalar josparynan týyndaıtynyn aıtty.
«Budan basqa, tutynýshylardyń quqyqtaryn qorǵaý, sáıkestikti baǵalaý jáne jylý energetıkasyna qatysty jańa zań jobalaryn ázirleý josparlanýda. «Quqyqtyq aktiler týraly» Zańǵa sáıkes jospardyń jobasy Memleket basshysymen kelisýge jatady. Jospar jobasyn Prezıdent Ákimshiligine jiberý usynylady», dep túıindedi Ádilet mınıstrliginiń basshysy.
