Kórme keıipkeri, eń aldymen, beıneniń epıkalyq kúshi ómirdiń ótpeli sátteriniń romantıkalyq sezimderimen úılesetin monýmentaldy jumystarymen tanymal. Bizdiń kóńilimizge qattalǵan Áýezov beınesi, ál-Farabı men Abaı tulǵasy, T.Júrgenov eskertkishi Sergebaev qoltańbasyn áıgilegen tól týyndylar. Qondyrǵyly plastıka salasynda ónimdi eńbek etken onyń shyǵarmashylyq joly ómirin ónermen órgisi kelgenderge aınymas úlgi.
Músinshiniń belsendi shyǵarmashylyq qyzmeti 60-jyldary, qazirgi zamannyń qajettilikterine jaýap beretin, boıyna obrazdyń astarly mánin, epıkasy men allegorııasyn biriktiretin jańa kórkemdik stıldi qalyptastyrýdy maqsat etken, keńestik ónerge talantty sýretshiler men músinshilerdiń jańa býyny kelgen kezde bastaldy. E.Sergebaevtyń erterektegi «S.Aıtbaevtyń portreti» (1967), «Abaı» (1968), «Zamandastyń portreti» (1972) kompozısııalary formasynyń jalpylyǵymen, sulbanyń ornyqtylyǵymen jáne tutastyǵymen, ishki energetıkasymen jáne avtordyń zymyraǵan ýaqyt sezimin, ákeler men balalar arasyndaǵy rýhanı sabaqtastyqtyń mańyzdylyǵyn jetkizýge umtylysymen erekshelenedi. 80-jyldardaǵy eńbekterinde sheber monýmentaldy stılge, ótken men búgindi fılosofııalyq paıymdaýǵa bet burady.
Esken Sergebaev 1940 jyly 19 mamyrda Almatyda dúnıege keldi. N.Gogol atyndaǵy kórkemsýret ýchılıshesinde N.Jýravlevten tálim aldy. 1969 jyly I.Repın atyndaǵy Lenıngrad keskindeme, músin jáne sáýlet ınstıtýtynyń músin fakýltetin bitirdi. 1960 jyldan Qazaq KSR Kórkemsýret qorynda jumys istedi, al 1974 jyldan «О́ner» kórkemsýret kombınatynda bas sýretshi boldy.
Kórkemóner akademııasynyń tolyq múshesi E.Sergebaev oqytýshylyq qyzmetti belsendi atqaryp keledi. 1969 jyldan bastap N.Gogol atyndaǵy Almaty kórkemsýret ýchılıshesinde, al 1978 jyldan Teatr jáne kórkemsýret ınstıtýtynda oqytýshy, keıinnen dosent bolyp jumys istedi. 2010 jyldan bastap qazirgi ýaqytqa deıin E.Sergebaev T.Júrgenov atyndaǵy Qazaq ulttyq óner akademııasynda músin kafedrasynyń meńgerýshisi, professory qyzmetin atqarady.
Ekspozısııaǵa avtordyń Á.Qasteev atyndaǵy óner mýzeıi qorynda jáne óz sheberhanasynda saqtalǵan ár jyldardaǵy 70 shyǵarmasy enip otyr. Táýelsizdik toıyna arnalǵan rýhanı joba jeltoqsan aıynyń ortasyna deıin jalǵasady.
ALMATY
