Bulaı saǵyna sóıleýimizdiń sebebi, belgili sýretshi Meıirjan Nurǵojınniń «Aport» kartınasy. Bizdi qylqalam sheberiniń «Jaz dámi» toptamasynan alynǵan týyndysy tánti etti. Onyń kórkemsýrettegi realıstik ádisti jaqtaýshylardyń qatarynan ekeni kópke aıan. Bul shyǵarma sol tujyrymdy keńinen tarqata túskendeı.
Qyzyǵy da sol, avtordyń shyǵarmashylyq lokomotıvi – balalyq shaqtyń beketi. Búgingi kózqaras bıiginen sol alańsyz sátterdiń áserleri men estelikterine, bozbalalyq dúrbeleńderge kóz salady. Balalyq shaq taqyrybynyń onyń shyǵarmashylyǵynan erekshe oryn alýynyń sebebi – osy. Balanyń shynaıylyǵy men tazalyǵyn, qorshaǵan ortany tanýdaǵy áýesqoılyǵyn jáne ańqaýlyǵyn dál baıqap jetkizedi. Kartınalarynyń negizgi keıipkerleri kúshikter men laqtar, alma men oıynshyqtar sekildi balalyq shaqtan habar beretin súıkimdi detaldar.
Baıqasańyz, sýretshiniń shyǵarmashylyǵyna ulttyq názik boıaý, lırıkalyq kóńil kúı sińgen. Ol belgili bir taqyryppen shektelip qana qalmaıdy. Ony tarıh pen soǵys taqyryptary da, taý men dala, qala kórinisteri, romantıkalyq-lırıkalyq sıýjetter, natıýrmorttar sııaqty turmystyq dúnıeler de qyzyqtyrady.
«Jaz dámi» toptamasyndaǵy «Aport» kartınasynda jazdyń ystyq kúninde asyr salǵan eki bala beınelengen. Eresekteý bala quraq kórpe jaıylǵan arbanyń syryǵynda ózin shabandoz sezinip otyr. Ol basyna gazetten jasalǵan pılotka kıgen, beline baılaǵan qyzǵylt jeıdesi quraq kórpeniń betin jaýyp tur. Al kishkentaı bala kórermenge enteleı tik qaraıdy. Qolyna pisken úlken alma ustap alǵan. Balalardyń kópshiligi úlkenderdiń aıaq kıimin kıgendi unatatyny anyq. Balanyń aıaǵyna úlken báteńke kıgizý arqyly sýretshi osy qasıetti de óz týyndysyna engizgen. Bul – kartınanyń qupııasy.
Ákeniń ıa aǵanyń tozǵan báteńkesi, maılanyp mańdaıǵa jabysqan shash, jerde shashylyp jatqan ataqty almatylyq aport, mine, osylardyń barlyǵy kórermenin birden eliktirip áketedi. Sýretshi jaryq pen kóńil kúıdiń ártúrli áserin sheber jetkizgen. Ásirese, boıaýlardyń bir-birimen ustasyp turýy qaıran qaldyrady.
Shyny kerek, kartınaǵa uzaq qarap tursańyz, bir sát ýaıymsyz balalyq shaqqa saıahattaǵandaı bolasyz.
