Mersısaıd okrýginiń polısııasy Lıverpýldegi áıelder aýrýhanasy ǵımaratynyń janynda kóliktiń jarylǵany týraly habarlady. Oqıǵa saldarynan bir adam qaıtys bolyp, taǵy bireýi zardap shekken. Derekterge sensek, jarylys ǵımarat mańyna jetken avtokólik ishinde bolǵan.
Búginde bul lańkestik áreket boıynsha tergeý amaldary júrip jatyr. Polısııanyń terrorızmge qarsy bólimshesi jumys isteýde. Terrorızm týraly zańǵa sáıkes 21, 26 jáne 29 jastaǵy úsh er adam kúdikti retinde ustaldy.
«Taksı júrgizýshisi qaıǵyly oqıǵanyń aldyn aldy. Ol terrorıstti avtokóligine qamap, halyqty úlken apattan qutqardy», deıdi jergilikti BAQ. Boljam boıynsha, jankeshti ózin-ózi jaryp jibergen.
Júrgizýshiniń dosy Deıv Perrı «Daily Mail» basylymyna habarlaǵandaı, jankeshtiniń bastapqy maqsaty Lıverpýldegi dinı ǵımarat bolǵan, onda eske alý kúni qurmetine oraı kóptegen adam jınalǵan.
«Jolaýshy Devıdten dinı ǵıbadathanaǵa barýdy ótingen. Sondyqtan biz bul onyń basty maqsaty dep sanaımyz. Biraq olar kólik keptelisine tap bolǵan. Sol sebepti jolaýshy dinı ǵımarattyń ornyna aýrýhanaǵa barýdy ótingen», deıdi ol.
Áleýmettik jelilerde taksı júrgizýshisiniń taǵy bir dosy Stıven Tomastyń pikiri paıda boldy. Ol «Júrgizýshi jolaýshynyń ózin kúmándi ustaǵanyn baıqap, sodan keıin kólikten sekirdi» dedi. Alaıda bul pikir rastalǵan joq.
BAQ keltirgen málimetterge sensek, taksı júrgizýshisi ómirge qaýip tóndirmeıtin jaraqat alǵan.
