Osyǵan oraı, Qostanaı oblysynyń ákimi Arhımed Muhambetov arnaıy keńes ótkizip, Ahmet Baıtursynulynyń 150 jyldyǵyn merekeleýge daıyndyq máselesin talqylady.
Qostanaı oblysyna kelesi jyly Ahańnyń mereıtoıyna arnalǵan 8 is-shara uıymdastyrý týraly mindet júktelgen. Bıyldyń ózinde Qarasý aýyly Ahmet Baıtursynuly aýyly bolyp ózgertildi, sondaı-aq Jangeldın aýdanynyń kólik ınfraqurylymyn jaqsartý boıynsha 1 mlrd teńgeden astam qarjyǵa birneshe joba iske asyryldy. Atap aıtqanda, aýdan ortalyǵy Torǵaı aýylyndaǵy Ahmet Baıtursynuly kóshesi abattandyryldy, Shubalań, Qarasý, Kókalat aýyldarynyń arasyndaǵy jol jóndeýden ótti, sondaı-aq birneshe kóshege jóndeý júrgizildi. Sonymen qatar jergilikti halyqtyń ótinishi boıynsha Aqkól men A.Baıtursynuly aýyldaryn jáne basqa da ınjenerlik nysandy jalǵaıtyn Uly Jylanshyq ózeni arqyly kópir salyndy.
– Atalǵan is-sharalardan basqa, qala men aýdan ákimdikterine respýblıkalyq jáne oblystyq josparlarda kózdelgen barlyq ǵylymı-aǵartýshylyq, mádenı-buqaralyq jáne basqa da ımıdjdik is-sharanyń oryndalýyn qamtamasyz etý tapsyryldy. Mereıtoılyq kúndi IýNESKO aıasynda halyqaralyq deńgeıde atap ótý josparlanýda. Osyǵan baılanysty halyqaralyq ǵylymı-tájirbıelik konferensııalar, Ahmet Baıtursynulynyń týǵan jerine ǵylymı-tanymdyq ekspedısııa uıymdastyrý josparlanǵan. Jangeldın aýdanynyń mádenıet basqarmasy jáne ákimdigimen birlesip maýsymdyq-tarıhı jáne art-alań ashý máselesi qarastyrylýda, sondaı-aq A.Baıtursynulyna arnalǵan Vızıt-ortalyqtyń mazmuny men formaty boıynsha pysyqtaý júrgizilýde, – dedi oblys ákimi.
Munyń syrtynda, 2022-2023 oqý jylynda jergilikti bıýdjet qarajaty esebinen «Altyn belgi» ıegerlerine oblys úshin mańyzdy pedagogıkalyq jáne ınjenerlik-tehnıkalyq mamandyqtar boıynsha Ahmet Baıtursynuly atyndaǵy granttar beriletin bolady. Sondaı-aq Qostanaı, Arqalyq qalalary men Áýlıekól, Jangeldın aýdandarynda ornalasqan A.Baıtursynuly eskertkishterine aǵymdaǵy jóndeý júrgiziledi.
Qostanaı oblysy
