Jaýapty vedomstvonyń derekterine sáıkes bıyl qańtar-qazan aralyǵynda elimizde 88 mln tonnaǵa jýyq kómir (kómir konsentratyn qospaǵanda) óndirildi. Bul byltyrǵy deńgeıden (100,2%) joǵary.
«Energııa óndirýshi kásiporyndarǵa shamamen 48 mln tonna, ónerkásiptik kásiporyndarǵa 5 mln tonna, kommýnaldyq-turmystyq qajettilikterge jáne halyqqa 7,6 mln tonnadan astam kómir tıeldi. «Qazaqstan temir joly» UQ» AQ óńirlerge kómirdi jetkizý jospary basym negizde oryndalatynyn jáne kómir kenishterinen túsetin ótinimder ulǵaısa, qajettilikti ashyq vagondarmen qamtamasyz etýge óziniń daıyn ekenin rastady», delingen mınıstrliktiń aqparatynda.
Keńes barysynda Aqmola, Almaty, Shyǵys Qazaqstan, Qostanaı, Qyzylorda, Pavlodar, Soltústik Qazaqstan oblystarynyń, Almaty men Nur-Sultan qalalarynyń turǵyndary úshin kómirdi jóneltý jospary pysyqtaldy. Osy óńirlerdiń ákimdikteri turǵyndardyń kómirge qajettiligin qamtamasyz etýdi ýaqtyly baqylaýy tıis.
Quzyrly organnyń bastamasymen jáne óndirýshilerdiń qoldaýymen qarashada óńirlerge kómir jetkizý kólemi 487 myń tonnaǵa ulǵaıtylmaq. Halyq arasynda úlken suranysqa ıe Shubarkól kómiriniń 240 vagony óńirlerge kún saıyn qosymsha jóneltiledi deıdi mınıstrlik.
Kómir kásiporyndary qatty otynnyń qajetti kólemin óndirýge, al temirjolshylar kómirdi ýaqtyly jetkizýge jaýapty. Jergilikti atqarýshy organdar tutyný kólemin naqty josparlaýǵa, kómir satyp alýdy ýaqytynda júrgizýge, sondaı-aq onyń óńirdegi jáne barlyq qoryn baqylaýda ustaýy tıis dep sanaıdy Indýstrııa mınıstrligi.
Baǵa monıtorıngin júrgizý jáne qatty otyn qunyn kóterý jaǵdaılaryn anyqtaý – quzyretti ýákiletti organdardyń mindeti.
Kómir baǵasynyń ósýine jol bermeý maqsatynda tıisti vedomstvo Taý-ken óndirý jáne taý-ken metallýrgııa kásiporyndarynyń qaýymdastyǵymen memorandýmǵa qol qoıdy.
Resmı statıstıkaǵa sáıkes kenishterden kómirdi jiberý baǵasy Qaraǵandy oblysynda tonnasyna – 7 093 teńge, Pavlodar oblysynda – 3 375 teńge, sondaı-aq tutastaı elimizde – 5 600 teńge.
