12 qarashada Nur-Sultan qalasynyń tergeý soty Eljan Birtanovqa bultartpaý sharasyn taǵy da uzartty. Sot ony taǵy eki aı, 14 qańtarǵa deıin, taraptar qylmystyq is materıaldarymen tanysqansha, úı qamaýynda bolý kerek dep eseptedi. Biraq Birtanov pen onyń qorǵaýshylary bul sheshimmen kelispedi.
18 qarashada Nur-Sultan qalalyq sotynda apellıasııalyq shaǵymdy qaraý bastaldy. Eks-mınıstrdiń advokattary sot alqasynyń sýdıasy Eleonora Ońǵarsynovaǵa qarsylyq bildirdi. Advokat Nurlan Beısekeevtiń aıtýynsha, buǵan deıin sýdıa Birtanovqa úı qamaýyn uzartý týraly olardyń apellıasııalyq shaǵymdaryn qaraǵan, sondyqtan ol birjaqty bolýy múmkin.
«Sýdıa Ońǵarsynova óziniń burynǵy qaýlylaryna baılanysty shaǵymdy erkin, beıtarap jáne táýelsiz qaraı almaıdy. Ol Birtanovty qamaýǵa alýdy uzartý týraly óziniń sheshimderine qarsy shyǵa almaıdy», dep tolyqtyrdy advokat Dmıtrıı Kýrıachenko.
Sýdıa Almas Tájimbetov qarsylyq bildirýden bas tartty. Ol advokattardyń dálelderi qylmystyq iske qatysty ekenin túsindirdi.
Advokat Nurlan Beısekeev tergeý sotynyń sýdıasy Aqmaral Isaevanyń qaýlysynyń kúshin joıý kerektigin aıtty.
«Kýáger Soı, ıaǵnı qazirgi densaýlyq saqtaý mınıstri, 2020 jylǵy 21 qazanda sózbe-sóz bylaı dedi: «aktilerdi Shýbın men Esenbaı qol qoıýǵa alyp keldi jáne jumystardyń oryndalǵanyn túsindirip, tıisti qujattardy qosa berdi. Barlyq qajetti vızalar turǵanyna kóz jetkizgennen keıin men oryndalǵan jumystardyń aktilerine qol qoıdym». Tergeýshi Ashenovtyń eki ret qoıǵan suraǵyna kýáger Soı: «Birtanov maǵan oryndalǵan jumystardyń aktilerine qol qoıý jóninde eshqandaı tapsyrma bergen joq, Birtanov platforma boıynsha barlyq jumys kólemin qabyldaý týraly máseleni aldyma qoıǵan joq», dep oqydy advokat.
Eks-mınıstrdiń ózi sottan úı qamaýyn uzartý týraly qaýlyny alyp tastap, ony eshqaıda ketpeý týraly qolhatpen almastyrýdy surady.
«Men osy shekteýdi eshqandaı jolmen buzbaıtynyma jáne Qazaqstan Respýblıkasynyń Zańyn qandaı da bir jolmen buzbaıtynyma, sizderdiń abyroılaryńyzǵa kepildik beremin. Men zańǵa baǵynatyn azamatpyn. Men bul isti zańdy túrde qaraýǵa múddelimin», dedi Eljan Birtanov.
Al prokýror Tólegen Jaraspaev óz sózinde Birtanovtyń úı qamaýyn uzartý týraly qaýlyny ózgerissiz qaldyrýdy ótindi.
Nátıjesinde, sýdıa Ońǵarsynova 12 qarashadaǵy qaýlyny ózgerissiz qaldyryp, advokattardyń jeke shaǵymdaryn qanaǵattandyrmady.
Eske sala ketsek, burynǵy Densaýlyq saqtaý mınıstri Eljan Birtanov Densaýlyq saqtaý mınıstrliginiń Aqparattandyrý platformasyn qabyldaý jáne paıdalanýǵa berý arqyly laýazymdyq ókilettikterin asyra paıdalandy dep aıyptalýda. Qylmystyq is 133 tomnan turady.
Birtanov bir jyldan beri úı qamaqta otyr
