Baspasóz konferensııasy barysynda spıkerler «Pandemııadan keıingi jańa álem» taqyrybyna arnalǵan úsh kúnge sozylǵan «Astana klýbynyń» otyrysy jóninde keńinen áńgimeledi ári Álemdik ekonomıka jáne saıasat ınstıtýt (ÁESI) jáne Nursultan Nazarbaev Qory uıymdastyrǵan aýqymdy is-shara óz deńgeıinde uıymdastyrylǵanyn jetkizdi.
ÁESI dırektory Erjan Saltybaevtyń aıtýynsha, úsh kúndik is-sharaǵa 50-den astam bedeldi álemdik spıker, sonyń ishinde memleketter jáne úkimetterdiń burynǵy basshylary, halyqaralyq uıymdar men ortalyqtardyń jetekshileri, sondaı-aq iri halyqaralyq BAQ ókilderi qatysty. Klýb otyrysy aralas formatta – onlaın jáne oflaın ótti. «Astana klýbynyń» keıbir sessııalary dástúr boıynsha Chatham house erejesine sáıkes, ıaǵnı jabyq formatta ótti.
Brıfıngte aıtylǵandaı, bir jyl úzilisten keıin ótkizilgen otyrys baǵdarlamasynda 13 kezdesý boldy. Taqyryptar boıynsha jahandyq ekonomıka, geosaıasat jáne halyqaralyq qatynastar, klımattyń ózgerýi jáne ıadrolyq qaýipsizdik máseleleri qozǵaldy. Atap aıtqanda, jıynda «Koronavırýs pandemııasy: qaýip jaǵdaıynda qalpyna kelý, Covid-19 jańa mýtasııalary men bólingen álem úshin saldarlary», «Ulttyq múddeler dáýiri: ujymdyq qaýipsizdik júıesiniń rekonfıgýrasııasy», «Jasyl transformasııa jáne jańa klımattyq kún tártibiniń damýshy elderge tıgizetin áseri», «Álemdik ekonomıkadaǵy teńsizdikter: damýshy elder aldyndaǵy syn qaterler, «Uly bólinis: jahandanýdyń jańa arhıtektýrasy qandaı bolady?», «AQSh-Qytaı teketiresi: álem ekonomıkasy men geosaıasatyna áserleri», «Batys vs Reseı: Eýrazııalyq ekonomıkalyq odaq úshin saldarlary», «Aýǵanstan bolashaǵy jáne onyń Ortalyq Azııa aımaǵyna áserleri», «Iran men Taıaý Shyǵys: ıadrolyq mámile jáne aımaq perspektıvasy», «Jańa álemdik tártip nemese tehnologııalyq ústemdik úshin talas» taqyryptary áńgime arqaýy boldy.
Sondaı-aq «Astana klýby» alańynda Táýelsizdiktiń 30 jyldyǵyna oraılastyrylǵan «Táýelsizdiktiń 30 jyldyǵy: Nazarbaev strategııasy jáne Qazaqstan men Ortalyq Azııanyń bolashaǵy» taqyrybyndaǵy talqylaýda el damýynyń tájirıbesine, sondaı-aq ishki jáne syrtqy saıasatyn qalyptastyrýdaǵy Tuńǵysh Prezıdenttiń róline keshendi baǵa berildi.
Iаdrolyq qaýipsizdik úshin Jahandyq Kóshbasshylar Alıansynyń kezdesýi aıasynda ıadrolyq qaýipsizdik máselesine erekshe nazar aýdaryldy. «Tún ortasy aıaq basty: ıadrolyq dıalog ýaqyty» sessııasy barysynda spıkerler jahandyq strategııalyq turaqtylyq salasyndaǵy daǵdarys jaǵdaıy jáne alıans jumysynyń aldaǵy baǵyttaryn talqylady.
Kóshbasshylardyń jahandyq Alıansy Qazaqstannyń Tuńǵysh Prezıdenti Nursultan Nazarbaevtyń bastamasymen 2019 jyly «Astana klýbynyń» besinshi otyrysynyń qorytyndysy boıynsha quryldy.
«Astana klýbynyń» jumysy Qazaqstan Respýblıkasynyń Tuńǵysh Prezıdenti – Elbasy Nursultan Nazarbaevtyń qatysýymen ótken «Úlken Eýrazııa: bolashaq álem kórinisi» plenarlyq otyrysymen aıaqtaldy.
