«Saryarqa-2021» saıysynyń ótýine jaýapty mamannyń biri Buqar jyraý aýdandyq dene shynyqtyrý jáne sport bóliminiń basshysy Oleg Sygankov aýdanda ulttyq sport túrlerinen jarys jıi uıymdastyrylyp turatynyn atap ótti.
– Jarystar kúzde de, qysta da ótedi. Bul sport túriniń jankúıerleri negizinen aýyldyq jerlerden keledi. Degenmen qazir qalalyqtar da qyzyǵýshylyq tanyta bastady. Mysaly, osy joly Qaraǵandy men Temirtaýdyń ókilderi de synǵa tústi. Kóshbasshylar qatarynda Qarqaraly jáne Jańaarqa aýdandarynyń sportshylary boldy, – deıdi O.Sygankov.
Bul jolǵy jarysta qyran qustar qoıanǵa túsip, túlkiniń tulybyn ilip, sondaı-aq arnaıy jattyǵýlardy oryndady.
Asa tartysty ótken chempıonat qorytyndysynda Buqar jyraý aýdanyndaǵy Doskeı aýylynyń turǵyny Temirǵalı Tólegenuly búrkitpen ań aýlaý synynda jeńimpaz atandy. Qaraǵandylyq Aslan Eginbaı ekinshi júldege ıe bolsa, úshinshi oryndy Buqar jyraý aýdanyndaǵy Toǵyzqudyq aýyly atynan synǵa túsken Metaı Esenkeldi mise tutty.
Al qarshyǵalar synǵa túsken saıysta qaraǵandylyq Zańǵar Dosannyń qusy top jardy. Jańaarqalyq Karıfýlla Amangeldi men Shákárim Ábdirahman, sáıkesinshe ekinshi jáne úshinshi júldelerdi ıemdendi.
Aqtoǵaı aýdanynyń namysyn qorǵaǵan Tańat Ospanqulovtyń qusy suńqarlar synynda úzdik shyqty. Shet aýdanynan qatysqan Asan Ábdirazaqovqa ekinshi júlde buıyrdy. Al qola medal qaraǵandylyq Kúntýǵan Ádilhannyń enshisine tıdi.
Joǵary deńgeıde ótken besinshi chempıonatta top jarǵan qusbegiler aldymyzdaǵy aqpan aıynda ótetin respýblıkalyq chempıonattyń joldamasyna ıe boldy.
Qaraǵandy oblysy,
Buqar jyraý aýdany
