Álem • 19 Qarasha, 2021

Jyrtqysh janýarlardy sırkte oınatýǵa tyıym salyndy

782 ret

kórsetildi

1 mın

oqý úshin

Fransııa parlamenti jabaıy janýarlardy satyp alýǵa, ósirýge jáne sırkterge satýǵa tyıym salatyn janýarlar quqyǵyn qorǵaý týraly jańa zańdy maquldady, dep habarlaıdy Egemen.kz.

Gaýhar QAPASh

Jyrtqysh janýarlardy sırkte oınatýǵa tyıym salyndy

Deutsche Welle basylymynyń málimetinshe, 2020 jyldan beri talqylanyp jatqan zańnama arystan, jolbarys jáne aıý sııaqty jabaıy janýarlar paıdalanatyn shoýlarǵa tyıym salady jáne 2024 jyly kúshine enedi.

Sondaı-aq jabaıy janýarlardy telebaǵdarlamalarda, túngi klýbtarda jáne jeke keshterde paıdalanýǵa, terisi úshin kúzen ósirýge de zań boıynsha tyıym salynatyny aıtyldy.

Sonymen qatar jańa zań janýarlarǵa qatygezdik jasaǵany úshin eń joǵary jazany bes jylǵa bas bostandyǵynan aıyrýǵa jáne 75 000 eýroǵa (36 mıllıon teńge) aıyppul salýǵa deıin kóteredi.

Fransııa Prezıdenti Emmanýel Makronnyń ortalyq partııasy «Qozǵalystaǵy respýblıka» (LREM) bul zańdy janýarlar quqyǵyndaǵy tarıhı qadam dep atady. Saýalnamalar Fransııadaǵy adamdardyń kópshiligi jabaıy sırk janýarlaryn paıdalanýǵa tyıym salýdy qoldaıtynyn kórsetti.

Alaıda kóshpeli sırk ıesi jáne sırk janýarlaryn jattyqtyrýshylar fransýz kásipodaq uıymynyń jetekshisi Ýılıam Kervıch onyń músheleri sotqa shaǵymdanyp, narazylyq bildiretinin aıtty. Aıta keteıik, Fransııada 120-ǵa jýyq sırk bar.